КИЕВ, 6 июнь. /“Дунё” АА/. Украинанинг оммабоп “Kyiv Diplomatic” журнали расмий интернет-порталида Ўзбекистоннинг бой маданий мероси ва сайёҳлик салоҳиятига бағишланган “Пилладан матогача: “Euronews” ўзбек ипакчилигининг тирик санъати ҳақида” сарлавҳали мақола чоп этилди, деб хабар қилмоқда “Дунё” АА мухбири.

Мақолада халқаро “Euronews” янгиликлар порталининг Ўзбекистондаги ипакчилик анъаналари, кўҳна ҳунармандчиликнинг замонавий шароитларда ривожланиши ҳамда кўп асрлик технологиялар ва қўл меҳнатининг уйғунлигига бағишланган материали шарҳланган.

Нашрда ёзилишича, ипак мато яратилиш жараёнининг бутун занжири — пиллани қайта ишлашдан тортиб, тайёр маҳсулот ишлаб чиқаришгача бўлган босқичлар халқаро экспертлар эътиборида бўлди. Бу борада Фарғона водийсидаги Марғилон шаҳри асосий марказлардан бири бўлиб қолаётгани, бу ерда кўплаб жараёнлар ҳанузгача қўлда бажарилиши ва маҳаллий корхоналарда ип тайёрлашдан тортиб атлас ва адрас тўқишгача бўлган тўлиқ ишлаб чиқариш цикли йўлга қўйилгани қайд этилган. Матога гул чизиш ва ранг танлаш юксак аниқлик ҳамда тажриба талаб этиши, бу жараёнда малакали усталар ва дизайнерлар иштирок этиши баён қилинган.

“Kyiv Diplomatic” ипакчилик тармоғи нафақат маданий меросни сақлаш, балки мамлакат иқтисодиётида ҳам муҳим ўрин тутишини таъкидлайди. Хусусан, Фарғона вилоятида йилига қарийб 2900 тонна пилла етиштирилиб, тўқимачилик, гиламдўзлик ва ҳунармандчилик секторлари хомашё билан таъминланмоқда ҳамда тайёр маҳсулотнинг салмоқли қисми хорижга экспорт қилинмоқда.

Шунингдек, Бухоро шаҳрида ипак матолар замонавий дизайнерлик либослари, пойабзал ва аксессуарлар яратишда асос бўлаётгани, Хивада эса сайёҳлар учун ипак тўқиш ва бўяш жараёнлари интерактив шаклдаги маҳорат дарслари орқали намойиш этилаётгани билдирилган. Бундай ёндашув маданий туризмни ривожлантиришга ва маҳаллий ҳунармандларни қўллаб-қувватлашга хизмат қилмоқда.

“Ўзбекистонда ипакчилик музей экспонати эмас, балки замонавий шароитларга мослашиб, изчил ривожланаётган тирик санъатдир. Тармоқ анъанавий усулларни сақлаган ҳолда, янги технологияларни жорий этмоқда ва тарихий мерос ҳамда иқтисодий имкониятларнинг муваффақиятли уйғунлигини намойиш этмоқда”, — дея хулоса қилинади Украина нашрида.