ТОШКЕНТ, 18 октябрь. /“Дунё” АА/. АҚШ давлат котиби Марко Рубионинг Ўзбекистонга ташрифи ҳамда унинг Самарқандда бўлиб ўтадиган Марказий Осиё давлатлари ва Қўшма Штатлар ташқи сиёсат идоралари раҳбарлари учрашувидаги иштироки етакчи халқаро ОАВ эътиборини тортди, деб хабар бермоқда “Дунё» АА мухбири.

Хусусан, “Reuters”, “AFP” агентликлари, “Yahoo News”, “Barron’s” янгиликлар порталлари, “Eurasia Review” таҳлилий портали, Американинг “MSN” радиоси, Франциянинг “TV5 Monde” телеканали ва Италиянинг “Internazionale” онлайн нашри ушбу ташриф ҳақида АҚШнинг Марказий Осиёдаги дипломатияси фаоллашуви, минтақа давлатлари билан иқтисодий алоқаларни кенгайтириш ва стратегик шерикликни мустаҳкамлаш нуқтаи назаридан ёзмоқда.

Бир қатор етакчи босма ва электрон оммавий ахборот воситалари Ўзбекистон ва умуман Марказий Осиё давлатларининг бошқа мамлакатлар учун истиқболли ҳамкор сифатидаги аҳамияти ортиб бораётганига эътибор қаратмоқда.

Хусусан, “Reuters” ташрифни прагматик нуқтаи назардан таҳлил қилиб, АҚШ ташқи сиёсатида Марказий Осиёнинг ўрни ортиб бораётганига урғу берган. Мақолада таъкидланишича, табиий ресурсларга бой минтақа Вашингтонда, жумладан, савдо-иқтисодий ҳамкорликни кенгайтириш ва ўзаро манфаатли алоқаларни ривожлантириш борасида тобора катта қизиқиш уйғотмоқда.

Материаллари “Yahoo News” ва “Barron's” томонидан ҳам чоп этилган “AFP” агентлиги ўзгарувчан халқаро вазият фонида АҚШнинг ўз стратегик иштирокини кенгайтириш орқали Марказий Осиё мамлакатлари билан муносабатларни мустаҳкамлашга интилишига алоҳида эътибор қаратган.

Шунингдек, хорижий ОАВ Марко Рубионинг ташрифини кенг минтақавий кўламда кўриб чиқмоқда. Самарқандда “Марказий Осиё – АҚШ” (C5+1) форматидаги вазирлар учрашувининг ўтказилишига алоҳида аҳамият берилмоқда. Зеро, унинг доирасида Вашингтон ва минтақанинг бешта давлати умумий устувор йўналишларни муҳокама қилади.

Умуман олганда, ташрифнинг халқаро ОАВда ёритилиши АҚШ ташқи сиёсатининг муҳим йўналиши сифатида Марказий Осиёга бўлган эътибор ортиб бораётганини акс эттиради.