ВАРШАВА, 17 октябрь. /“Дунё” АА/. Польшанинг нуфузли “Pb.pl” электрон порталида Ўзбекистоннинг инвестициявий салоҳияти ва амалга оширилаётган иқтисодий ислоҳотларга бағишланган таҳлилий мақола чоп этилди, деб хабар бермоқда “Дунё” АА мухбири.

Мақолада қайд этилишича, глобал логистика занжирларининг ўзгариши ва геосиёсий жараёнлар шароитида Ўзбекистон юқори иқтисодий ўсиш суръатларини намоён этаётган ҳамда хорижий капитал учун очиқ бўлган муҳим минтақавий марказ сифатида Польша компанияларида катта қизиқиш уйғотмоқда. Хусусан, “Rohlig SUUS Logistics” ва “APS Energia” каби йирик поляк корхоналари мамлакатимизда ўз филиаллари ва қўшма корхоналарини ташкил этиб, фаолиятини кенгайтираётгани алоҳида таъкидланган.

Нашрда Ўзбекистон иқтисодиётининг юқори суръатларда ривожланаётгани, жумладан, ЯИМ ўсиши юқори кўрсаткичларни қайд этаётгани, аҳоли сони 40 миллионга яқинлашиб, ўртача ёш 29,3 ёшни ташкил этиши инвесторлар учун катта афзаллик экани қайд этилган. Валюта курсининг либерализация қилиниши, бизнесни рўйхатдан ўтказиш тартиб-қоидаларининг соддалаштирилиши ва давлат-хусусий шериклик механизмларининг ривожланиши мамлакатнинг инвестициявий жозибадорлигини оширмоқда.

Шунингдек, Польша инвестициялар ва савдо агентлиги (PAIH) ҳамда PwC экспертларининг баҳолашларига кўра, қишлоқ хўжалиги, қайта ишлаш саноати, логистика, қайта тикланувчи энергетика, фармацевтика ва ахборот технологиялари соҳаларида ҳамкорлик учун кенг имкониятлар мавжудлиги кўрсатиб ўтилган.

Мақолада таъкидланишича, Польша фуқаролари учун жорий этилган визасиз режим ҳамда Варшава ва Тошкент ўртасидаги тўғридан-тўғри авиақатновлар икки томонлама ишбилармонлик алоқаларини янада фаоллаштиришга хизмат қилмоқда. Шу билан бирга, апрель ойида ташкил этилган Польша-Ўзбекистон саноат-савдо палатаси икки мамлакат бизнес вакиллари ўртасидаги шерикликни мустаҳкамлашга фаол кўмаклашмоқда.