ОСЛО, 23 июль. /"Дунё" АА/. Норвегиянинг "Geopolitika" журналида Жаҳон иқтисодиёти ва дипломатия университети (ЖИДУ) биринчи проректори Акрам Умаров билан суҳбат чоп этилди, деб хабар қилмоқда "Дунё" АА мухбири.

Интервьюда сўнгги йилларда Ўзбекистоннинг ижтимоий-иқтисодий ва сиёсий ривожланиши ҳамда модернизациясининг асосий трендлари ҳақида сўз юритилган.

Шунингдек, Марказий Осиёдаги мураккаб геосиёсий вазият билан боғлиқ муаммоларни муваффақиятли минималлаштириш ва ҳал этиш ҳамда очиқ денгиз савдо йўлагига тўғридан-тўғри чиқиш имконини бермайдиган шароитда республика учун самарали ташқи сиёсат стратегиясини амалга оширишга алоҳида эътибор қаратилди.

"Ўзбекистон-Норвегия муносабатларига келсак, икки давлат ўртасида профилактик дипломатия ва тинчликни мустаҳкамлаш, барқарор ривожланиш, экология ва таълим соҳаларида тажриба алмашиш каби йўналишларда ўзаро ҳамкорлик салоҳияти ортиб бормоқда", – деган ЖИДУ проректори.

"Geopolitika" журнали замонавий глобал сиёсатнинг долзарб муаммоларини ўрганиш ва таҳлил қилишга ихтисослашган. Журнал бош муҳаррири Хенрик Вереншёльд жорий йил июнь ойида Ўзбекистонда бўлди. Сафар давомида у Ўзбекистон илмий-тадқиқот марказлари ва экспертлар ҳамжамияти билан учрашувлар ўтказди.