ҚОҲИРА, 12 май. /“Дунё” АА/. Мисрнинг “Sada Elbalad English” ахборот агентлиги Тошкентда бўлиб ўтадиган “TextileExpo Uzbekistan 2026” 26-халқаро тўқимачилик ва тикувчилик саноати кўргазмасига бағишланган мақола эълон қилди, деб хабар бермоқда “Дунё” АА мухбири.

Унда “TextileExpo Uzbekistan” Марказий Осиё тўқимачилик ва тикувчилик саноатининг ишлаб чиқарувчилар, етказиб берувчилар ва профессионал харидорларни бирлаштирувчи энг йирик B2B платформаси экани қайд этилган.

“Кўргазма иштирокчиларга ишончли шериклар билан тўғридан-тўғри алоқа ўрнатиш, соҳанинг замонавий йўналишлари билан танишиш ва ўзаро манфаатли ҳамкорлик истиқболларини муҳокама қилиш имкониятини тақдим этади”, – дейилади мақолада.

Тадбирда дунёнинг 7 мамлакатидан 150 дан ортиқ таъминотчи, жумладан, Хитой компаниялари иштирок этиши хабар қилинган. Экспозиция хомашёдан тортиб тайёр маҳсулот ва аксессуарларгача бўлган ишлаб чиқариш жараёнининг барча босқичларини қамраб олади.

Кўргазма доирасида мақсадли B2B шаклидаги учрашувларни ўтказиш, узоқ муддатли шериклик алоқаларини ривожлантириш ва экспорт шартномаларини тузишга алоҳида эътибор қаратилиши таъкидланган.

Мақола якунида нашр “TextileExpo Uzbekistan” кўргазмаси Ўзбекистон тўқимачилик саноати маҳсулотларини илгари суриш ва хорижий бозорлар билан ҳамкорликни кенгайтириш учун муҳим халқаро майдон бўлиб қолаётганини қайд этган.