КУАЛА-ЛУМПУР, 15 июнь. /"Дунё АА/. Малайзиянинг етакчи "New Straits Times" ва "The Star" нашрларида "Ўзбекистон жаҳон чемпионати йўлланмасини қўлга киритгач, муваффақиятнинг ширин таъмини татиб кўрмоқда" сарлавҳали мақолалар чоп этилди, деб хабар қилмоқда "Дунё" АА мухбири.

Уларда "Оқ бўрилар" жорий йилнинг 5 июнь куни Бирлашган Араб Амирликларида 0:0 ҳисобида дуранг натижа қайд этиб, кенгайтирилган 48 жамоадан иборат 2026 йилги Жаҳон чемпионати йўлланмасини қўлга киритгани маълум қилинган.

Мақолаларда Ўзбекистон 1991 йилда мустақилликка эришганидан сўнг, ҳозиргача етти марта мундиаль учун кечган қитъа саралаш баҳсларида учинчи ўриндан юқорига кўтарила олмагани таъкидланган.

Нашрларда ёзилишича, сўнгги йилларда Ўзбекистон Футбол ассоциацияси жаҳон аренасига сўнгги қадамни қўйиш учун ёш иқтидорларни кашф этишга катта сармоя киритмоқда. Қайд этилганидек, хусусан, терма жамоа бош мураббийи Тимур Кападзе таркибни ёш авлод футболчилар, жумладан, "Манчестер Сити"нинг 21 ёшли марказий ҳимоячиси Абдуқодир Ҳусанов билан кучайтирди.

"Узоқ ва машаққатли йўл босиб, муҳим натижага эришдик. Бу натижа учун кўп меҳнат қилинди. Халқимизни чин дилдан табриклайман. Бу нафақат бизнинг, балки бутун халқимизнинг ғалабаси. Футболчиларимиз ҳар бир учрашувда қатъият кўрсатишди, бор шиддатимиз билан ишладик ва натижага эришдик", – дея Тимур Кападзе сўзларидан иқтибос келтирилган манбаларда.

Футболчи сифатида Ўзбекистон терма жамоаси сафида 119 марта майдонга тушиб, ўтган йилги Олимпия ўйинларида 23 ёшгача бўлган терма жамоани бошқарган Кападзе, январь ойида Ўзбекистон миллий терма жамоаси бош мураббий этиб тайинланди, деб таъкидланган нашрларда.

Малайзия ОАВ БАА билан ўтган шиддатли ўйиндан сўнг Ўзбекистон Президенти Шавкат Мирзиёев спортчиларни тарихий ғалаба билан шахсан ўзи телефон орқали табриклаганига алоҳида эътибор қаратган.

"Осиёнинг энг кучли жамоалари билан бўлган муросасиз баҳсларда сизлар ўзлигингизни, букилмас ирода ва профессионаллингизни намоён этдингиз", – дея давлатимиз раҳбари сўзларидан иқтибос келтирилади мақолаларда.