ВАРШАВА, 20 июль. /"Дунё" АА/. Польшанинг оммабоп "Kierunek Kaukaz" электрон порталида футбол бўйича Ўзбекистон миллий терма жамоасининг 2026 йилда Шимолий Америка қитъасида бўлиб ўтадиган Жаҳон чемпионати йўлланмасини қўлга киритганига бағишланган мақола эълон қилинди, деб хабар қилмоқда "Дунё" АА мухбири.

"Ўттиз йилдан ортиқ вақт давомида футбол бўйича Ўзбекистон миллий терма жамоаси ўз олдига қўйилган вазифани бажара олмади. Жаҳон чемпионатининг барча циклларида Ўзбекистон терма жамоасига қандай кичик деталлар халал берарди. Аммо 2026 йилда бўлиб ўтадиган Жаҳон чемпионатининг саралаш босқичлари Ўзбекистон учун омадли келди. Хусусан, шу 5 июнь куни БАА билан кечган ўйинда қайд этилган голсиз дуранг жамоани мундиалга олиб чиқди", – дейилган материалда.

Нашрда таъкидланганидек, Ўзбекистон Марказий Осиё давлатлари орасида тарихда биринчи бўлиб Жаҳон чемпионати финал босқичига йўлланмани қўлга киритган мамлакатга айланди.

"Ўзбек футболчилари 6 июнь куни Тошкентга қайтганларида уларни мамлакат расмийлари ва аҳолиси қаҳрамонлардек кутиб олди. Президент Шавкат Мирзиёевнинг фармони билан нафақат футболчилар, балки жамоага алоқадор барча – мураббийлар, шифокорлар, таржимонлар ва бошқалар давлат мукофоти билан тақдирланди", – дея таъкидланган нашрда.

Муаллиф ёзганидек, Ўзбекистон учун миллий терма жамоанинг ушбу оламшумул ютуғи майдондаги муваффақиятдан ҳам кўпроқ нарсани англатади.

Ўзбекистон ўтган йиллар давоми Жаҳон чемпионати саралашларида мухлисларни кўп бора ранжитган. Хусусан, 2006 йилда Баҳрайнга қарши ҳал қилувчи плей-офф ўйинида ҳакамларнинг баҳсли қарори Ўзбекистон термасини қийин аҳволга солиб қўйди ва якунда жамоа плей-офф босқичига чиқиш имкониятидан маҳрум бўлди. 2014 йилда эса Жанубий Кореяга қарши ўйинда жамоа бир тўп фарқи туфайли финал йўлланмасини қўлдан бой берди. Орадан 4 йил ўтиб Ўзбекистон Жанубий Кореяга қарши гуруҳ ўйинида ғалаба қозониб, Россияда финалга чиқиши мумкин эди, бироқ ўша баҳс ҳам дуранг билан якунланди.

"Ушбу омадсизликларнинг ҳаммаси унутилди, мамлакат терма жамоаси ўз олдига қўйилган мақсаддан чекинмади ва ниҳоят, 2025 йил 5 июнь оқшомида Ўзбекистон терма жамоаси ўз орзусини амалга оширди. Яъни ўттиз йилдан ортиқ вақт давомида орзулигича қолган Жаҳон чемпионатига чиқиш вазифасини уддалади", – дейилган материалда.

Мақола сўнггида "Бутун Ўзбекистон халқи сизлар билан ҳақли равишда фахрланмоқда", – дея Ўзбекистон Президентининг ушбу муҳим воқеликдан сўнг футболчиларга йўллаган табригидан иқтибос келтирилган.