ИСЛОМОБОД, 17 август. /“Дунё” АА/. Покистоннинг “The World News” нашрида Ўзбекистон Президентининг тадбиркорлар билан бўлиб ўтган беш йиллик очиқ мулоқотига бағишланган мақола эълон қилинди, деб хабар бермоқда “Дунё” АА мухбири.

Нашрда таъкидланишича, ўтган даврда ўтказилган бешта учрашув доирасида давлат ва хусусий сектор ўртасидаги ишончни тиклашга алоҳида эътибор қаратилган.

Шу билан бирга, тадбиркорлар билан учрашувларда бизнес капитали, ер, энергия ва бозорлардан фойдаланиш имкониятларини кенгайтириш, тадбиркорлик фаолиятини қонунийлаштириш, рақамли молиявий хизматлар, стартапларни ривожлантириш, инвестицияларни ҳимоя қилиш масалаларига тўхталиб ўтилган.

Материалда ёзилишича, тадбиркорликни ривожлантириш йўналишида қабул қилинган қарорлар хусусий секторни янада кенгайтириш, рақобатбардошликни ошириш ва мамлакатнинг барқарор иқтисодий ўсиши учун замин яратаяпти.

Навбатдаги, олтинчи очиқ мулоқотда бизнесга сунъий интеллект ва рақамли технологияларни жорий этиш, малакали кадрлар тайёрлаш, энергия самарадорлигини ошириш, халқаро стандартларни татбиқ этиш ҳамда рақобатбардош миллий брендларни яратишга алоҳида эътибор қаратилиши режалаштирилган.