ЛОНДОН, 27 октябрь. /“Дунё” АА/. 2027 йилда Жиззах вилоятида ҳар бирининг қуввати 1000 МВт бўлган атом электр станциясининг иккита йирик энергоблоки қурилиши режалаштирилмоқда, деб хабар бермоқда “Дунё” АА мухбири Британиянинг “World Nuclear News” порталига таяниб.

Мақолада ёзилишича, Бўлажак АЭС майдонида аллақачон иккита кичик модулли реактор (КМР) қурилиши амалга оширилмоқда. 2026 йил май ойида пойдеворнинг биринчи бетон плитаси қуйилган бўлиб, у билан боғлиқ ишларни йил охиригача якунлаш режалаштирилган.

“Росатом” маълумотларига кўра, кичик реакторлар ёнида ВВЭР-1000 реакторларига эга, ҳар бирининг қуввати 1000 МВт бўлган иккита энергоблок жойлаштирилади. Ҳозирда майдонда муҳандислик-қидирув ишлари олиб борилмоқда ва лойиҳа такомиллаштирилмоқда.

“Росатом” раҳбари Алексей Лихачёвнинг фикрича, ушбу лойиҳа ҳозирда экспорт модели бўйича амалга оширилаётган дунёдаги ягона кичик атом электр станцияси ҳисобланади.

Қурилиш майдонида 1000 нафардан ортиқ киши меҳнат қилмоқда. Яқин ойларда ходимлар сонини камида икки баробарга ошириш режалаштирилган. Умумий қурилиш ишларининг катта қисмини Ўзбекистон компанияларига топшириш мўлжалланмоқда.

Шу билан бир қаторда, узоқ муддатли ишлаб чиқариш циклига эга ускуналар тайёрланмоқда. Кичик энергоблоклардан бири учун реактор корпуси аллақачон тайёр. КМРнинг биринчи блоки учун тезкор ходимларни ишга олишни 2027 йил охирига келиб бошлаш режалаштирилган.

Станция яқинида биринчи босқичда 33 минг аҳолига мўлжалланган “ядро шаҳарчаси”ни қуриш режалаштирилган. Лойиҳада энергия тежамкор уй-жойлар, таълим, тиббиёт ва спорт объектларини барпо этиш кўзда тутилган.

Порталда қайд этилишича, Ўзбекистон Президенти Шавкат Мирзиёевнинг “Росатом” раҳбари билан учрашувида атом энергетикаси учун малакали кадрлар тайёрлаш ҳамда уй-жой қурилиши соҳасидаги ҳамкорлик масалалари муҳокама қилинган.