СТОКГОЛЬМ, 16 июнь. /“Дунё” АА/. Швеция пойтахтида Дипломатлар ассоциацияси томонидан анъанавий тарзда ўтказиладиган миллий таомлар ва ичимликлар фестивали бўлиб ўтди, деб хабар бермоқда “Дунё” АА мухбири.

Швецияда аккредитациядан ўтган дипломатик ваколатхоналар ва халқаро ташкилотлар ўз миллий пазандалик ҳамда маданий анъаналарини намойиш этган ушбу тадбирда мамлакатимиз элчихонаси ҳам миллий стенд билан фаол иштирок этди.

Дипломатик корпус, швед жамоатчилиги ҳамда турли соҳа вакилларидан иборат 300 нафардан зиёд меҳмон ташриф буюрган фестивалда Ўзбекистон павильони алоҳида ажралиб турди.

Кўргазмада меҳмонларга миллий таомларимизнинг сара намуналари тақдим этилди. Шунингдек, юртимизнинг бой гастрономик мероси ва меҳмондўстлик анъаналари ҳақида батафсил маълумотлар берилди.

Фестиваль якунларига кўра, ўзбек миллий таомлари ҳакамлар ҳайъати ва иштирокчилар томонидан юқори баҳоланиб, мамлакатимиз элчихонаси “Энг яхши миллий таом” номинацияси бўйича совриндорлар қаторидан жой олди.