БЕРЛИН, 21 январь. /“Дунё” АА/. Германиянинг “Ostwirtschaft.de” иқтисодий нашрида Ўзбекистон Президенти ҳузуридаги Статистика агентлиги маълумотларига таяниб, мамлакатимизнинг тадбиркорлик соҳасидаги жорий ҳолати ҳақида таҳлилий мақола эълон қилди, деб хабар беради “Дунё” АА мухбири.

Нашрнинг қайд этишича, 2026 йилнинг 1 январь ҳолатига кўра, Ўзбекистонда жами 474 минг 899 та фаол корхона ва ташкилотлар мавжуд (йирик қишлоқ хўжалиги корхоналари ва деҳқон хўжаликлари бундан мустасно). Уларнинг асосий қисмини, яъни 407 минг 850 тасини бевосита тижорат корхоналари ташкил этади. Шунингдек, мақолада таъкидланишича, мамлакат иқтисодиётининг асосий ҳаракатлантирувчи кучи кичик ва микро-корхоналар бўлиб қолмоқда. Уларнинг сони 403 минг 767 тани ташкил этиб, жами фаол корхоналарнинг қарийб 85 фоизини ташкил қилади.

Статистик маълумотлар шуни кўрсатмоқдаки, сўнгги йилларда корхоналар сонида маълум бир пасайиш кузатилган. Хусусан, 2023 йилдаги рекорд даражадаги кўрсаткичдан (592 мингдан ортиқ корхона) сўнг, бозорда маълум бир “фильтрланиш” жараёни юз берган. Бу жараён тадбиркорлик субъектларининг миқдоридан сифатига, яъни янада барқарор ва рақобатбардош тузилмаларнинг сақланиб қолишига ўтилаётгани билан изоҳланиши мумкин.

Иқтисодий фаоллик ҳамон пойтахт Тошкент шаҳрида юқорилигича қолмоқда, хусусан, Тошкент шаҳрида 108 минг 700 та корхона (жами корхоналарнинг 23 фоизи). Бундан ташқари, Тошкент, Самарқанд, Фарғона ва Қашқадарё вилоятлари бу борада етакчи вилоятлар ҳисобланади, деб ёзади немис манбаси.

Ушбу бешта ҳудуд ҳиссасига мамлакатдаги жами корхоналарнинг ярмидан кўпи тўғри келади. Соҳалар бўйича эса савдо (32%), саноат ҳамда қишлоқ ва ўрмон хўжалиги тармоқлари етакчилик қилмоқда.

Германия нашри Ўзбекистонда хорижий капитал иштирокидаги корхоналар сони сезиларли даражада ошганига алоҳида эътибор қаратган. Уларнинг сони 18 минг 164 тани ташкил этган ва бир йил ичида 22 фоиздан ошган. Сўнгги беш йил ичида хорижий капитал иштирокидаги компаниялар сони деярли икки бараварга кўпайган.

Инвесторлар географияси бўйича Хитой энг йирик сармоядор бўлиб қолмоқда, кейинги ўринларни Россия ва Туркия давлатлари эгаллаб турибди.

Хорижий капитал иштирокидаги компанияларнинг тўртдан уч қисми тўлиқ чет эллик инвесторларга тегишли экани мамлакатдаги инвестиция муҳитининг жозибадорлиги ва ҳуқуқий ҳимоянинг мустаҳкамлигидан далолат беради.

Немис экспертларининг фикрича, Ўзбекистон иқтисодиётида кечаётган бу ўзгаришлар бозорнинг трансформация жараёнида эканини ва хорижий инвесторларнинг мамлакат келажагига бўлган ишончи мустаҳкамланиб бораётганини кўрсатмоқда.