ТОШКЕНТ, 31 август. /«Дунё» АА/. Сенатнинг Суд-ҳуқуқ масалалари ва коррупцияга қарши курашиш қўмитаси раиси Абдулхаким Эшмуратов бошчилигидаги Ўзбекистон Олий Мажлиси делегацияси “Тинчлик ва умумий фаровонлик йўлидаги ҳамжиҳатлик: халқаро ҳуқуқни мустаҳкамлаш ва можароларни тинч йўл билан ҳал этиш” мавзусида жорий йилнинг 26–28 август кунлари Камбоджа пойтахтида бўлиб ўтган II парламент спикерларининг парламентлараро конференциясида иштирок этди, деб хабар бермоқда “Дунё” АА мухбири.

Парламент юқори палатаси маълумотига кўра, ушбу нуфузли халқаро тадбирда Камбоджа, Покистон, Россия, Беларусь, Мексика, Гана, Бруней, Мьянма ҳамда бошқа бир қатор давлатлар парламентлари аъзолари дунёда тинчликни мустаҳкамлаш, парламент дипломатияси ва халқаро ҳамкорликни кучайтириш масалалари юзасидан фикр алмашдилар.

Сенатор ўз маърузасида парламент дипломатиясида Ўзбекистон ўзига хос миллий тажрибага эга эканлигини, Марказий Осиёда яхши қўшничилик, ўзаро ишонч ва амалий ҳамкорлик муҳити сезиларли даражада мустаҳкамланганини, мураккаб масалаларни музокаралар орқали ҳал этиш амалиётига алоҳида урғу берилаётганини таъкидлади.

Тадбир доирасида Камбоджа қироли Нородом Сиамони Ўзбекистон Олий Мажлиси делегацияси билан учрашиб, икки томонлама ҳамкорлик масалаларини муҳокама қилди.

Шунингдек, Ўзбекистон Олий Мажлиси делегацияси Россия, Беларусь, Вьетнам парламентлари вакиллари билан парламентлараро ҳамкорликни кучайтириш масаласи юзасидан учрашувлар ўтказди.

Ўзбекистон парламенти аъзолари Камбоджа миллий бренди остида ишлаб чиқариладиган маҳсулотлар кўргазмасида ҳам иштирок этди.