ЛИМА, 30 июнь. /“Дунё” АА/. “Халқ кучи” консерватив партиясидан номзод, собиқ президент Альберто Фухиморининг қизи Кейко Фухимори Перу президентлик сайловида 50,14 фоиз овоз тўплаб, ғалаба қозонди, деб хабар бермоқда “Дунё” АА мухбири “Bloomberg” ахборот агентлигига таяниб.

Қайд этилишича, унинг асосий рақиби, “Перу учун биргаликда” сўл партияси вакили Роберто Санчес 49,87 фоиз овоз олган. Номзодлар ўртасидаги фарқ қарийб 49,6 минг овозни ташкил этди.

51 ёшли Кейко Фухимори овозларни санаб чиққани учун Миллий сайлов кенгашига миннатдорлик билдирди ва 3 июлга белгиланган натижаларнинг Миллий сайлов ҳайъати томонидан расман тасдиқланишини кутаётганини маълум қилди.

Президентлик сайловининг биринчи тури 12 апрелда, иккинчиси эса 7 июнда бўлиб ўтган. Натижалар расман тасдиқланган тақдирда, Кейко Фухимори 28 июль куни беш йиллик муддатга ўз лавозимини эгаллайди. У Перу тарихидаги биринчи аёл президент бўлади. Бу унинг давлат раҳбари этиб сайланиш учун тўртинчи уриниши эди.

Умуман олганда, Перудаги сайловлар жиноятчиликнинг ўсиши ва сиёсий беқарорлик фонида ўтди, шу сабабли, сўнгги ўн йил ичида мамлакатда саккиз нафар президент алмашди. Мамлакатнинг сўнгги президенти Хосе Херига парламент ишончсизлик вотумини билдирди. Бу йилги сайловларда қарийб 35 миллион аҳолидан 18 миллиондан ортиқ сайловчи иштирок этди.

Янги президент 1990 йилдан 2000 йилгача мамлакатни бошқарган собиқ Перу президенти Альберто Фухиморининг қизидир. Ҳокимиятдан четлатилганидан сўнг, у мансаб ваколатини суиистеъмол қилиш, коррупция ва инсониятга қарши жиноятларда айбланиб, судланган эди. 2023 йилда Перу Конституциявий суди унинг афвини тиклади, 2024 йилда эса собиқ президент 86 ёшида вафот этди.

“AP” агентлиги сурати