ВАШИНГТОН, 16 август. /“Дунё” АА/. АҚШ Конгресси аъзоси, Америка Қуролли кучлар қўмитаси Киберхавфсизлик, ахборот технологиялари ва инновациялар бўйича қуйи қўмита раиси Дон Бэкон Ўзбекистон мустақиллигининг 35 йиллиги арафасида “Дунё” АА орқали юртдошларимизга ўзининг самимий табриги ва эзгу тилакларини йўллади.

– Ўзбекистон халқини мамлакат мустақиллигининг 35 йиллиги билан самимий муборакбод этаман.

Ўзбекистонга қилган ташрифим Конгрессдаги ўн йиллик фаолиятим давомидаги энг ёрқин хотиралардан бири бўлди.

Мустақиллик нафақат суверен ва эркин давлатнинг дунёга келишини англатади, балки ўзбек халқининг матонати ва иродасининг мустаҳкамлигидан ҳам далолат беради.

АҚШ Ўзбекистон билан шериклик муносабатларини доим юксак қадрлайди. Мамлакатингизнинг иқтисодий ислоҳотларни амалга ошириш, минтақавий барқарорликни мустаҳкамлаш ҳамда халқаро ҳамкорликни ривожлантириш борасидаги ютуқлари эътирофга лойиқ.

Демократик институтларни мустаҳкамлаш, инсон ҳуқуқларини кенгайтириш ва халқ фаровонлигини таъминлашга қаратилган ислоҳотларни олқишлаймиз.

Мамлакатларимизни мустақиллик, суверенитет ва ҳудудий яхлитлик тамойилларига содиқлик бирлаштириб туради ва биз келгуси йилларда ҳамкорлигимизни янада кенгайтиришга ишонамиз.

Мустақиллик Ўзбекистон халқига тинчлик-осойишталик, фаровонлик ва янги умидлар олиб келсин.

Яна бир бор самимий табрик ва эзгу тилакларимни изҳор этаман.