ТОШКЕНТ, 14 август. /«Дунё» АА/. Олий Мажлис Сенати раиси Танзила Норбоева бугун Тошкентда ўтказилган “Мустақил Ўзбекистон – 35 йиллик тараққиёт йўли: ислоҳотлар, натижалар ва истиқболлар” номли халқаро анжуманда нутқ қилди, деб хабар бермоқда “Дунё” АА мухбири.

Сенати Раисининг таъкидлашича, мустақилликнинг 35 йиллиги нафақат босиб ўтилган йўлни баҳолаш, балки мамлакатнинг келгуси тараққиёти учун устувор йўналишларни белгилаб олиш имконини беради.

Қайд этилганидек, сўнгги йилларда Ўзбекистонда давлат ва жамият ҳаётининг барча соҳасида кенг кўламли ислоҳотлар амалга оширилди. Ушбу ўзгаришлар марказида инсон, унинг қадр-қиммати ва манфаатлари туради.

Танзила Норбоева асосий йўналишлар сифатида иқтисодиётни либераллаштириш, камбағалликни қисқартириш, ижтимоий ҳимояни кучайтириш, таълим ва соғлиқни сақлаш тизимларини ислоҳ қилиш, тадбиркорликни қўллаб-қувватлаш ҳамда суд тизимини такомиллаштиришни алоҳида санаб ўтди.

“Ҳозирги кунда олдимизда турган асосий вазифа – барқарор иқтисодий ўсиш суръатларини сақлаб қолиш ва унинг амалий натижаларини ҳар бир ҳудуд, ҳар бир туман ва ҳар бир оила ўз ҳаётида ҳис этишини таъминлашдир”, – дея таъкидлади Сенат раиси.

Нутқда парламентаризмни ривожлантиришга алоҳида эътибор қаратилди. Янги таҳрирдаги Конституция давлат бошқаруви тизимида парламентнинг роли ва масъулиятини оширгани, қатор ваколатларнинг Президентдан парламентга ўтказилиши ҳокимият тармоқлари ўртасидаги мувозанатни янада мустаҳкамлашга хизмат қилмоқда.

Танзила Норбоева парламент самарадорлиги қабул қилинган қонунлар ёки ўтказилган тадбирлар сони билан эмас, балки уларнинг аҳоли ҳаётига кўрсатаётган амалий таъсири билан баҳоланиши лозимлигини билдирди. Шу муносабат билан парламент фаолиятида урғу аста-секин расмий назоратдан ечимларни биргаликда излаш ва аниқ натижаларга эришишга қараб силжимоқда.

Маҳаллий Кенгашларнинг ўрни алоҳида қайд этилди. Сенат раисининг сўзларига кўра, янги конституциявий тузум шароитида уларнинг ҳудудларни ривожлантириш, бюджет ижросини таъминлаш ва аҳолини ташвишга солаётган масалаларни ҳал этиш борасидаги ваколатлари ва масъулияти ортмоқда. Сенат маҳаллий Кенгашларни қўллаб-қувватлашни ўз фаолиятининг устувор йўналишларидан бири сифатида белгилаган.

Сенат раиси халқаро ҳамкорлик хусусида сўз юритар экан, Ўзбекистоннинг очиқ ва прагматик ташқи сиёсати Марказий Осиёда ўзаро ишонч ва яхши қўшничилик муҳитини мустаҳкамлашга хизмат қилаётганини эътироф этди. Унинг фикрича, парламентлараро ҳамкорлик минтақавий ташаббусларни қўллаб-қувватлаш, сув таъминоти, энергетика, транспорт, савдо ва экология масалаларини биргаликда ҳал этишда муҳим ўрин тутмоқда.

Шунингдек, у Ўзбекистоннинг халқаро парламент мулоқотида фаол иштирок этаётгани ва мамлакат ташаббусларини илгари сураётганини таъкидлади. Хусусан, Ўзбекистон ташаббуси билан БМТ Бош Ассамблеясининг 15 дан ортиқ резолюцияси қабул қилингани, Парламентлараро иттифоқ ва хорижий давлатлар парламентлари билан ўзаро муносабатлар кенгайиб бораётгани алоҳида қайд этилди.

Танзила Норбоева сўзининг якунида тараққиётнинг янги босқичида турган асосий муаммолар – сунъий интеллект ва рақамли технологияларнинг жадал жорий этилиши, иқлим ўзгариши, сув ресурслари тақчиллиги ва глобал технологик рақобатнинг кучайишини санаб ўтди.

У сифатли иқтисодий ўсишни таъминлаш, юқори даромадли иш ўринларини яратиш, ёшларда замонавий билим ва кўникмаларни ривожлантириш, янги технологияларни жорий этиш ҳамда ҳудудлар ўртасидаги имкониятлар борасидаги номутаносибликни қисқартириш зарурлигини таъкидлади.