ВАРШАВА, 16 сентябрь. /“Дунё” АА/. Ўзбекистоннинг Андижон ва Фарғона вилоятлари экспорт компаниялари вакиллари учун Польшада фаолият юритаётган ўзбекистонлик тадбиркорлар иштирокида онлайн семинарлар ўтказилди, деб хабар бермоқда “Дунё” АА мухбири.

Тадбирларда кўплаб тадбиркорлар, ишлаб чиқариш ва экспорт билан шуғулланувчи компаниялар раҳбарлари, Ўзбекистон элчихонаси, вилоят ҳокимликлари ҳамда Енгил саноатни ривожлантириш агентлиги вакиллари иштирок этди.

Иштирокчилар Европа бозорига чиқиш масалалари, Польша қонунчилиги талаблари, бозор стандартлари, Лодздаги логистика ва омборхона имкониятларини муҳокама қилди. Бозор таҳлили, экспортни сертификатлаш, онлайн савдо, савдо уйларини ташкил этиш ва тижорат таклифларини тайёрлашга алоҳида эътибор қаратилди.

Польшадаги ўзбек бизнеси вакиллари ўз иш тажрибалари билан ўртоқлашди. Маҳаллий экспортчилар кўп йўл қўядиган хатолар, жумладан, бозорни етарли даражада таҳлил қилмаслик ва зарур сертификатларнинг йўқлиги хусусида алоҳида тўхталиб ўтилди.

Учрашувлар якунида Андижон ва Фарғона вилоятларининг Польшага бизнес-миссияларини тайёрлаш, тадбиркорларнинг 21–24 октябрь кунлари “Warsaw Home Textile 2026” ва 17–19 ноябрь кунлари “Fast Textile 2026” халқаро кўргазмаларида иштирок этиши бўйича келишувларга эришилди.