САНКТ-ПЕТЕРБУРГ, 10 июль. /“Дунё” АА/. Фарғонанинг “Нефтчи” футбол клуби ва Россия Премьер-Лигасининг амалдаги чемпиони “Зенит” жамоалари ўртасида ўртоқлик учрашуви бўлиб ўтди, деб хабар бермоқда “Дунё” АА мухбири.

Санкт-Петербургдаги “Газпром Арена” стадионида ўтказилган ўйинни 13 минг нафардан ортиқ киши томоша қилди. Ўйинни ҳокимият вакиллари, дипломатик корпус аъзолари, Россияда истиқомат қилаётган ватандошлар, ўзбекистонлик талабалар кузатиб, жамоаларни қўллаб-қувватлаб турди.

Ўзбекистоннинг Санкт-Петербургдаги Бош консулхонаси кўмагида ташкил этилган ушбу ўртоқлик ўйини тобора ривожланиб бораётган ўзбек футболини хорижда кенг тарғиб қилиш, маданий-гуманитар алоқаларни мустаҳкамлаш йўлида ташкил этилди.

Бош консулхона томонидан ижтимоий тармоқларда олиб борилган тизимли тарғибот натижасида стадионга мингга яқин ватандошимизни жалб этиш ва махсус фан-зона ташкил этишга эришилди. Ўзбекистонлик мухлислар стадионга миллий либослар, давлат рамзлари билан ташриф буюриб, ўйинчиларимизни бирдамлик билан олқишлаб турди. Стадиондаги барча эълон ва шарҳлар ўзбек тилида ҳам намойиш қилингани ҳамюртларимиз учун янада қулай муҳит яратди.

Ўйин “Зенит” жамоасининг ғалабаси билан якунланган бўлса-да, учрашув дўстлик ва ўзаро ҳурмат руҳида ўтди. Ўзбек футболчилари трибуналарнинг давомли олқишларига сазовор бўлди.