БАНГКОК, 27 июнь. /“Дунё” АА/. Бангкокдаги “Lumpini Stadium” аренасида “The Inner Circle 20” турнирининг асосий жанги бўлиб ўтди, деб хабар қилмоқда “Дунё” АА мухбири.

Унда “ONE FC Flyweight Muay Thai” чемпионлик камари учун ўзбекистонлик муай-тай жангчиси Асламжон Ортиқов россиялик спортчи Асадулла Имангазалиевга қарши рингга кўтарилди,

Асламжон Ортиков спорт фаолиятини Тошкентдаги “Shakhriyor” клубида бошлаган, кейинчалик эса Бангкокда жойлашган “TC Muay Thai” академиясида профессионал фаолиятини давом эттирган. Чемпионлик жанги олдидан у 24 та жангда мағлубиятга учрамаган ҳолда “ONE Championship”нинг энг истиқболли спортчиларидан бири сифатида эътироф этилган.

Унинг рақиби Асадулла Имангазалиев ҳам бунгача мағлубият нималигини билмай келаётган ва аввалги барча жангларини нокаут билан якунлаган эди.

Спорт нашрлари маълумотига кўра, чемпионлик жанги юқори суръат ва кескин рақобат остида кечиб, ҳар икки спортчининг фаолиятидаги энг муросасиз баҳслардан бирига айланган.

Беш раунд давом этган тўқнашувда спортчилар юқори техник маҳорати ва иродали курашни намойиш этди.

Баҳс якунида ҳакамларнинг бўлинган қарори билан Асадулла Иманғазалиев ғолиб деб топилди ва “ONE Championship”нинг энг енгил вазн тоифасидаги чемпионлик камарини қўлга киритди.

Жангни Ўзбекистоннинг Таиланддаги дипломатик ваколатхонаси вакиллари бевосита аренадан кузатиб, ҳамюртимиз Асламжон Ортиковни қўллаб-қувватлади.