ТОШКЕНТ, 17 июль. /“Дунё” АА/. АҚШ, Канада ва Мексика яшил майдонларида бўлиб ўтаётган футбол бўйича жаҳон чемпионати ўзининг сўнгги босқичига етиб келди, деб хабар қилмоқда “Дунё” АА мухбири.

Бир ойдан зиёд давом этган мусобақада атиги икки ўйин қолди: 19 июль куни Испания ва Аргентина жаҳон чемпионлиги учун майдонга тушса, бир кун аввал Франция ҳамда Англия учинчи ўрин учун баҳс олиб боради.

Бу икки учрашув нафақат медаллар тақдирини, балки бир қатор шахсий совринлар, рекордлар ва турнирнинг умумий статистикасини ҳам белгилаб беради.

Эътиборлиси, жаҳон чемпионатлари тарихида илк бор финалда амалдаги Европа чемпиони ва “Copa America” ғолиби ўзаро тўқнаш келади.

Испания турнир давомида энг барқарор ва тактик футбол намойиш этган жамоалардан бири бўлди. Испанлар тўп назорати, юқори прессинг ва тезкор ҳужумлари билан рақибларни қийин аҳволга солди.

Аргентина эса катта турнирлардаги бой тажрибаси ва ҳал қилувчи учрашувларда босимни енгиб ўтиш қобилияти билан финалгача етиб келди. Жамоа ҳимоядан ҳужумга тез ўтиш ва имкониятлардан самарали фойдаланишда ажралиб турди.

Бу финал ёшлик ва тажрибанинг ҳақиқий қарама-қаршилиги сифатида тарихга кириши мумкин. Испания таркибида ёш юлдуз Ламин Ямал турнирнинг энг ёш ва энг ёрқин кашфиётларидан бирига айланиши мумкин. Унинг дриблинги, тезлиги ва креатив ҳаракатлари ҳимоячилар учун жиддий муаммо бўлмоқда.

Аргентина эса Лионель Месси бошчилигида кўплаб қийин ва ҳал қилувчи баҳсларни ўз фойдасига ҳал қилди. Жанубий Америка вакилларининг финаллардаги руҳий барқарорлиги ва босимга чидамлилиги асосий устунлик ҳисобланади. Шу боис, ушбу финал нафақат икки жамоа, балки икки авлод футболи ўртасидаги кураш сифатида ҳам катта қизиқиш уйғотмоқда.

Финал ва учинчи ўрин учун баҳснинг тўпурарлар пойгасига таъсир қилиши ўйинларга қўшимча интрига бағишлайди. Испания, Аргентина, Франция ва Англия футболчилари якуний учрашувлардаги голлари билан турнирнинг энг яхши тўпурарига айланиш имкониятини сақлаб турибди.

Хусусан, Месси ва Мбаппеда 8 тадан, Кейн ва Беллингемда 6 тадан, Дембеле ва Оярсабалда 5 тадан гол бор. Улар охирги ўйинларда ҳам ўзларини кўрсатиб, голлар сериясини давом эттирса, турнирнинг энг яхши футболчисига бериладиган “Олтин тўп” (Golden Ball) совринини қўлга киритиш имконига эга бўлади.

Кўпчилик учинчи ўрин учун баҳсни аҳамиятсиз деб ҳисоблайди. Аммо бу ўйин инглиз ва француз футболчилари учун мавсумни медаль билан якунлаш, энг муҳими, ярим финалдаги мағлубиятдан кейин мухлислар олдидаги ишончни маълум маънода тиклаш имкониятидир.

Финал ўйинида эса қатор тарихий натижалар қайд этилади. Испания 16 йилдан сўнг навбатдаги, ўзининг иккинчи жаҳон чемпионлигини қўлга киритиш имкониятига эга. Аргентина эса кетма-кет иккинчи, ўз тарихида тўртинчи мундиал ғолиблигини нишонлаши мумкин.

23-жаҳон чемпионлиги учун баҳс 19 июль якшанба куни, Тошкент вақти билан соат 23:55да Нью-Йоркдаги “MetLife” стадионида бошланади. 3-ўрин учун ўйин эса 18 июль, шанбадан якшанбага ўтар кечаси, соат 02:00да Майамидаги “Hard Rock Stadium” стадионида бўлиб ўтади.