РИМ, 16 июнь. /“Дунё” АА/. Италиянинг “Il Giornale” газетасида Ўзбекистондаги иқтисодий ислоҳотлар ва мамлакатнинг Марказий Осиёдаги ўрнига бағишланган мақола эълон қилинди, деб хабар бермоқда “Дунё” АА мухбири.

Материалда ёзилишича, шу йилнинг 16–18 июнь кунлари бешинчи Тошкент халқаро инвестиция форумининг ўтказилиши Ўзбекистоннинг чекка бозордан халқаро инвесторлар эътибор марказидаги давлатлар қаторига кирганидан далолат беради. Ушбу форум ўсиш ва инвестицияларни диверсификация қилиш учун янги имкониятларга эга капитални жалб этишда муҳим майдонга айланган.

Материалда мамлакат иқтисодиётининг барқарор ривожланаётгани аниқ кўрсаткичлар билан тасдиқланиши қайд этилган. Хусусан, 2023 йилда Ўзбекистон ялпи ички маҳсулоти 6 фоизга ўсган, сўнгги йилларда эса тўғридан-тўғри хорижий инвестициялар ҳажми ўн баробардан зиёдга ошган.

Шунингдек, нашрда Ўзбекистоннинг Европа ва Осиё ўртасидаги транспорт йўллари чорраҳасида жойлашган қулай географик ўрни унинг минтақадаги муҳим логистика ва савдо маркази сифатидаги мавқеини мустаҳкамлашга хизмат қилаётгани алоҳида таъкидланган.

“Бугунги кунда тобора кўпроқ халқаро инвесторлар, жумладан, Италия компаниялари учун Ўзбекистон хатарли бозор эмас, балки узоқ муддатли ҳамкорлик ва сармоя киритиш учун стратегик йўналиш сифатида кўрилмоқда”, – дея якунлайди “Il Giornale”.