ВАШИНГТОН, 26 май. /“Дунё” АА/. АҚШ давлат котиби Марко Рубионинг таъкидлашича, АҚШ Украинадаги урушни тугатиш учун қўлидан келган барча ишни қилишга тайёр, деб хабар бермоқда “Дунё” мухбири.

Дипломат 26 май куни Россия ташқи ишлар вазири Сергей Лавров билан телефон орқали мулоқотига изоҳ берар экан, “Россия томонининг сўзларига кўра, бўлажак зарбалар туфайли Киев жуда хавфли жойга айланади”, – деди.

Марко Рубионинг қайд этишича, Россия бундай хабарни Украина пойтахтининг барча дипломатик ваколатхоналарига юборган, бироқ “Владимир Путин Сергей Лавров буни бевосита президент Дональд Трампга етказишини хоҳлагани аниқ”.

“Мен ҳозирда Украина билан фаол ёки режалаштирилган музокаралар йўқлигини, аммо агар шундай имконият туғилса, АҚШ ҳар доим конструктив ва фойдали роль ўйнашга тайёр эканини айтдим”, – деди давлат котиби.

У, шунингдек, 24 майга ўтар кечаси Россиянинг Киевга ҳужумига изоҳ берди.

“Ҳар сафар сиз у ёки бу томондан бу йирик зарбаларни кўрганингизда, бу нима учун Иккинчи жаҳон урушидан узоқроқ давом этаётган даҳшатли уруш эканини ва у тугаши кераклигини эслатиб туради. АҚШ бу урушнинг тугашига ёрдам бериш учун қўлидан келган барча ишни қилишга тайёр. Умид қиламанки, қачондир биз яна шундай имкониятга эга бўламиз”, – деди дипломат.

25 май куни кечқурун Россия ТИВ раҳбари Сергей Лавров Россия президенти Владимир Путиннинг топшириғига биноан Марко Рубио билан қўнғироқ қилганини маълум қилди. Суҳбат чоғида Россия ТИВ вазири Россия армияси “УҚК эҳтиёжлари учун фойдаланиладиган Киевда жойлашган объектларга ва тегишли қарорларни қабул қилиш марказларига тизимли ва изчил зарбалар беришни бошлаётганини” айтди.

Бундан ташқари, россиялик дипломат Россия Ташқи ишлар вазирлигининг АҚШ ва Киевда ваколатхоналари бўлган бошқа давлатларга “ўз дипломатик ходимлари ва бошқа фуқароларини Украина пойтахтидан эвакуация қилишни таъминлаш тавсия этилгани” ҳақидаги баёнотига эътибор қаратди.

Бунга жавобан Европа Иттифоқининг Украинадаги элчиси Катерина Матернова “Европа Иттифоқи ҳеч қаерга кетмаётганини” айтди. “Биз Киевда қоламиз. Биз Украина билан қоламиз”, – деди у.

Польша Ташқи ишлар вазирлиги, шунингдек, мамлакат дипломатик ваколатхоналарига ҳар қандай ҳужумлар “олдиндан режалаштирилган ва қасддан қилинган” деб ҳисобланишини айтди. Франция Ташқи ишлар вазирлиги ҳам Россиянинг чақириғини рад этиб, бу қадамни “қўрқитиш” деб атади.