ЛОНДОН, 8 июль. /“Дунё” АА/. Буюк Британиянинг нуфузли “World Nuclear News” порталида Ўзбекистонда қурилаётган АЭС лойиҳаси ҳақида мақола эълон қилинди, деб хабар бермоқда “Дунё” АА мухбири.

Нашрда ёзилишича, Халқаро атом энергияси агентлиги (ХАЭА) экспертлари Жиззахда қурилаётган илк АЭС лойиҳасини юқори баҳолаган. Ўзбекистон 2021 йилда белгиланган тавсияларни бажариш ва миллий қонунчиликни халқаро стандартларга мослаштириш бўйича катта ютуққа эришганини эътироф этган.

ХАЭА вакили Жон Хаддад Ўзбекистон кичик модулли реакторлар қураётган дунёдаги кам сонли давлатлардан бири экани ва ушбу ноёб тажрибани бутун глобал ядровий энергетика ҳамжамияти катта қизиқиш билан кузатаётганини алоҳида таъкидлаган.

Мақолада лойиҳанинг техник имконияти ва қуввати сезиларли даражада ошганига алоҳида эътибор қаратилган. Дастлаб, АЭС лойиҳаси фақатгина 330 МВтли кичик реакторлардан иборат бўлиши кўзда тутилган эди. Бироқ, 2025 йилдаги қўшимча келишувга асосан унинг конфигурацияси ўзгартирилиб, станция 2 та юқори қувватли ВВЭР-1000 (гигаваттли) ва 2 та кичик РИТМ-200Н реакторлари билан жиҳозланадиган бўлди. Бу лойиҳанинг умумий қувватини 2100 МВтдан ошириб, мамлакат энергетика тизими барқарорлигини янги босқичга олиб чиқади.

Портал қурилиш майдонидаги бунёдкорлик ишларига тўхталар экан, ўтган йили бошланган йирик ҳажмдаги ишлардан сўнг, жорий йил июнь ойида илк КМР пойдевор плитасига дастлабки бетон қуйилганини қайд этган.

Мақолада Ўзбекистоннинг атом соҳасидаги мустаҳкам пойдевори ҳақида ҳам сўз юритилган. Хусусан, Ўзбекистон уран захиралари бўйича дунёда 5-ўринда туриши ва Тошкентдаги Ядро физикаси институтида 1959 йилдан буён 10 МВтли ВВР-СМ тадқиқот реактори муваффақиятли ишлаб келаётгани алоҳида қайд этилган.

“Ўзатом” агентлиги раҳбарияти ушбу ХАЭА миссиясини миллий инфратузилмани холис баҳолаш ва кейинги амалий қадамларни белгилашдаги муҳим восита сифатида эътироф этган. Мазкур йирик лойиҳанинг илк энергия блокини 2029 йил якунига қадар ишга тушириш режалаштирилган.