ТОШКЕНТ, 25 август. /“Дунё” АА/. “Euronews” бош директори Клаус Штрунц Марказий Осиёнинг Европа учун аҳамияти ортиб бораётганини таъкидлаб, минтақалар ўртасидаги алоқаларни мустаҳкамлашга чақирди, деб хабар бермоқда “Дунё” АА мухбири.

У бу ҳақда Тошкентда ўтаётган “Ислом цивилизацияси: янги нигоҳ, янги кашфиётлар” халқаро медиафорумида “24.kg” ахборот агентлигига берган интервьюсида айтиб ўтди.

Клаус Штрунцнинг сўзларига кўра, 1980-йилларда Ғарб оммавий ахборот воситаларининг ахборот кун тартибида Марказий Осиё деярли тилга олинмаган. Минтақа ҳақида асосан хавфсизлик масалалари ва айрим фавқулодда ҳодисалар доирасида сўз юритилган.

“Бугун вазият бутунлай бошқача. Минтақа тарихи замонавий жаҳон кун тартибининг бир қисмига айланиб бораётганини кўриб турибмиз”, – деб таъкидлади у.

“Euronews” раҳбари Ўзбекистондаги ўзгаришлар ҳақида гапирар экан, Ғарб аудиторияси учун мамлакат тўғрисидаги илк репортажларини ёдга олди. Ўшанда у бозорлар, зираворлар, ёрқин ранглар, қимматбаҳо тошлар, матолар ва мазали мевалар хусусида кенг ёритган.

Унинг таъкидлашича, Ўзбекистондаги ўзгаришлар ва унинг жаҳон ҳамжамиятидаги ўрнини кузатиш кўпчиликда катта қизиқиш уйғотмоқда.

Клаус Штрунц Ўзбекистоннинг Россия, Хитой, Ҳиндистон ва Европа ўртасидаги географик жойлашуви ҳақида ҳам тўхталиб ўтди. Унинг фикрича, ушбу замин Марказий Осиёни савдо, янги бозорларни ривожлантириш ва хавфсизлик соҳасидаги ҳамкорлик учун муҳим маконга айлантирмоқда.

“Европанинг Ўзбекистон ва Марказий Осиёга диққат билан назар солиш вақти келди”, – деди у.

“Euronews” раҳбарининг фикрича, мамлакатлар ўртасидаги замонавий алоқалар транспорт инфратузилмаси доирасидан четга чиқиши лозим. Улар давлатларни маданий, иқтисодий, сиёсий ва гуманитар даражаларда бирлаштириши мумкин.

Клаус Штрунц янги Ипак йўли концепциясига алоҳида тўхталиб ўтди. У бу тушунча фақат йўллар ва логистика билан чекланиб қолмаслиги кераклигини таъкидлади.

Унинг фикрича, замонавий Ипак йўли билим ва илмий ғоялар, технология ва инновациялар, тил ва маданиятлар, таълим амалиётлари ва рақамли ечимлар алмашинувини таъминлаши керак.

“Биз замонавий Ипак йўлини одамлар, мамлакатлар ва цивилизациялар ўртасидаги алоқалар тизими сифатида қабул қилишимиз зарур”, – дея қайд этди “Euronews” вакили.

Унинг сўзларига кўра, Тошкент, Самарқанд ва Бухоро тарихий мерос, замонавий технологиялар ва инновацияларни ўзида мужассам этган янги халқаро ҳамкорлик марказларига айланиши мумкин.