ТОШКЕНТ, 24 июль. /“Дунё” АА/. Ўзбекистон Президенти Шавкат Мирзиёев бугун Иордания Подшоҳи Абдулла II ибн aл-Ҳусайн билан телефон орқали суҳбатлашди, деб хабар бермоқда “Дунё” АА мухбири.

Давлатимиз раҳбари матбуот хизмати маълумотига кўра, Иордания Подшоҳи Ўзбекистон Президентини туғилган куни билан самимий муборакбод этиб, мустаҳкам соғлиқ, бахт-саодат, дўст Ўзбекистон халқига тинчлик-омонлик ва фаровонлик тилади.

Мулоқот давомида Самарқандда ўтган сермаҳсул музокаралар ва эришилган муҳим келишувлар алоқаларимизда янги саҳифа очгани алоҳида қайд этилди.

Мамлакатларимиз ўртасида парламентлараро, ишбилармонлик ва маданий-гуманитар алмашинувлар кенгайиб бораётгани мамнуният билан таъкидланди.

Етакчилар сиёсий мулоқотни давом эттириш, савдо-иқтисодий алоқаларни янада чуқурлаштириш ҳамда олий даражадаги бўлажак тадбирларга пухта тайёргарлик кўриш муҳимлигига урғу беришди.

Халқаро ва минтақавий аҳамиятга молик долзарб масалалар юзасидан ҳам фикр алмашилди.