ТОШКЕНТ, 22 июль. /“Дунё” АА/. Гайанада мамлакат соҳиллари яқинида йўловчи паромининг ҳалокатга учраши оқибатида 53 киши ҳалок бўлди, ўнлаб йўловчилар бедарак йўқолди, деб хабар бермоқда “Дунё” ахборот агентлиги мухбири “France 24” маълумотларига таяниб.

Кема 18 июль куни кечқурун пойтахт Жоржтаундан Порт-Кайтума аҳоли пункти томон ҳаракатланаётган вақтида ағдарилиб кетган. Гайана бош вазири Марк Филлипснинг маълум қилишича, 76 киши қутқарилган, аммо яна қарийб 50 нафар йўловчининг тақдири ҳозирча номаълумлигича қолмоқда.

Расмий маълумотларга кўра, фожиа содир бўлган пайтда паром бортида 179 киши бўлган. Аввалроқ йўловчилар сони камроқ деб хабар қилингани сабабли, ҳалокатдан кейин маълумотларда чалкашликлар юзага келган.

“MV Barima” пароми соҳилдан тахминан 15 километр узоқликда денгиз тубидан топилган. Омонд қолган йўловчилардан бири ҳалокатдан олдин кучли овоз эшитгани, шундан сўнг кема ичига сув кира бошлагани ва у тезда ағдарилиб кетганини айтган.

Ҳалокатдан кейин расмийлар омон қолган капитан ва экипажнинг яна бир аъзоси текширувдан ўтказилганда, улар организмида марихуана излари аниқланганини маълум қилди. Гайана президенти Муҳаммад Ирфан Али фожиа сабабларини аниқлаш учун мустақил тергов ўтказилишини билдирди.

Кемалар ҳаракатини кузатувчи хизматлар маълумотларига кўра, “MV Barima” пароми 1939 йилда қурилган.

Гайана — Жанубий Американинг шимоли-шарқида жойлашган, инглиз тили расмий мақомга эга бўлган кичик давлат бўлиб, аҳолиси қарийб 800 минг кишини ташкил этади. Мамлакат 1966 йилда Буюк Британиядан мустақилликка эришган ва Жанубий Америкада инглиз тили давлат тили ҳисобланган ягона мамлакатдир.

Гайана минтақа аҳолиси энг кам давлатларидан бири бўлиб қолмоқда: унинг ҳудудининг катта қисмини Амазон тропик ўрмонлари эгаллайди. Шунингдек, мамлакат Венесуэла билан ресурсларга бой Эссекибо ҳудуди бўйича узоқ йиллардан бери давом этаётган ҳудудий баҳсда иштирок этмоқда. Ушбу ҳудуд Гайана ҳудудининг тахминан учдан икки қисмини ташкил қилади.