ТОШКЕНТ, 22 июль. /“Дунё” АА/. Ташқи ишлар вазири Бахтиёр Саидов бугун Малайзиянинг янги элчиси Рафеда бинти Абдул Азизни қабул қилди, деб хабар бермоқда “Дунё” АА мухбири.

“Малайзиянинг Ўзбекистондаги янги тайинланган элчиси Рафеда бинти Абдул Азиз хонимдан ишонч ёрлиқлари нусхаларини қабул қилишдан мамнунмиз, – деб ёзди Ўзбекистон ТИВ раҳбари ўзининг telegram-каналида. – Ўзбекистон ва Малайзия ўртасидаги кўп қиррали ҳамкорликни янада ривожлантириш истиқболларини муҳокама қилдик. Сўнгги йилларда олий даражадаги мулоқотлар туфайли икки томонлама муносабатлар сифат жиҳатидан янги босқичга кўтарилганини мамнуният билан қайд этдик.

Савдо-иқтисодий алоқаларни кенгайтириш, инвестициявий ҳамкорликни чуқурлаштириш ва кўплаб соҳаларда янги қўшма лойиҳаларни илгари суриш масалаларига алоҳида эътибор қаратдик.

Элчи хонимга мамлакатимиздаги дипломатик фаолиятида улкан муваффақиятлар тилаб, унинг масъулиятли фаолиятини ҳар томонлама қўллаб-қувватлашга тайёр эканимизни билдирдик”.

Эслатиб ўтамиз, Рафеда бинти Абдул Азиз 2023 йилдан буён Малайзиянинг Тошкентдаги дипломатик миссиясига раҳбарлик қилиб келган элчи Илхам Туа бин Иллиаснинг ўрнини эгаллади.

Рафеда бинти Абдул Азиз 2002 йилдан бери Малайзия Ташқи ишлар вазирлиги тизимида ишлаб келмоқда. У турли йилларда ТИВ марказий аппарати ва мамлакатнинг хориждаги элчихоналарида масъул лавозимларни эгаллаган. Дипломат 2021 йилдан буён Малайзиянинг Мисрдаги элчиси ўринбосари лавозимида фаолият юритиб келаётган эди.