АЛ-КУВАЙТ, 29 октябрь. /“Дунё” АА/. Жорий йилнинг 20–28 октябрь кунлари Кувайт, Ироқ ва Суриянинг етакчи ишбилармон доиралари вакилларидан иборат делегациянинг Ўзбекистонга ташрифи амалга оширилди, деб хабар бермоқда “Дунё” АА мухбири.

Мамлакатимизнинг Кувайтдаги элчихонаси ташаббуси билан ташкил этилган сафар давомида Янги Тошкент дирекцияси, тегишли вазирлик ва идоралар ҳамда маҳаллий компаниялар билан турли музокаралар ўтказилиб, қатор инвестициявий ҳамкорлик йўналишлари муҳокама қилинди.

Хусусан, Суриянинг “Oulabi” холдинги вакиллари билан учрашувларда Янги Тошкент ҳудудида замонавий турар жой мажмуаларини барпо этиш имкониятлари кўриб чиқилди. Суриялик инвесторлар “Murad Building” ва “Hayot Group” маҳаллий қурилиш компаниялари билан ҳамкорлик истиқболларини муҳокама қилди.

Кувайтлик инвесторлар билан музокараларда кўп функцияли тижорат мажмуасини қуриш, хусусий банк ташкил этиш ҳамда молиявий хизматларни ривожлантириш масалаларига алоҳида эътибор қаратилди. Жумладан, “Euro Sky Investment” ва “Noor Financial Investment Co” компаниялари вакиллари билан учрашувларда инвестиция лойиҳаларини амалга ошириш имкониятлари кўриб чиқилди.

Ироқнинг “Al-Khafaji Holding Group” ва “Al-Wateen & Al Razan” компаниялари раҳбарлари билан ўтказилган учрашувларда қурилиш, кўчмас мулк ва савдо инфратузилмаси соҳаларида ҳамкорлик қилиш, “Sarmed Al Khafaje” бренди остида заргарлик маҳсулотлари савдо тармоқларини ташкил этиш истиқболлари муҳокама қилинди.

Учрашувлар якунида томонлар таклиф этилган лойиҳаларни атрофлича ўрганиш ва музокараларни давом эттиришга келишиб олдилар. Айни пайтда хорижий инвесторларнинг таклифларини аниқ лойиҳаларга йўналтириш, маҳаллий ҳамкорлар билан алоқаларни мустаҳкамлаш ва дастлабки келишувларни амалий босқичга олиб чиқиш бўйича ишлар олиб борилмоқда.

Мазкур ташаббуслар Янги Тошкентнинг халқаро инвестициявий жозибадорлигини ошириш, Ўзбекистоннинг араб мамлакатлари билан савдо-иқтисодий алоқаларини кенгайтириш ҳамда мамлакат иқтисодиётига тўғридан-тўғри хорижий инвестицияларни жалб этишда муҳим аҳамият касб этади.