КУАЛА-ЛУМПУР, 25 март. /“Дунё” АА/. Ўзбекистон элчихонаси ташаббуси билан Малайзиянинг Кедах штатида юртимизнинг зиёрат туризми имкониятларига бағишланган тарғибот кампанияси ташкил этилди, деб хабар қилмоқда “Дунё” АА мухбири.

Мазкур лойиҳа Ўзбекистон Туризм қўмитаси, Кедах штати маъмурияти ҳамда “Batik Air” авиакомпанияси ҳамкорлигида амалга оширилди.

Тарғибот кампаниясини ташкил этишдан кўзланган асосий мақсад – Малайзиядан Ўзбекистонга ташриф буюрувчи сайёҳлар сонини янада оширишдир. Хусусан, машҳур локациялар қаторида Ланкави оролидаги катта форматли экранлар ҳамда Кедах штати марказий кўчаларида жойлашган, аҳоли гавжум ҳудудлардаги реклама экранларини келтириш мумкин. Ушбу акция маҳаллий аҳоли ўртасида катта қизиқиш уйғотмоқда.

Ўзбекистоннинг сайёҳлик салоҳияти, қадимий ва замонавий меъморий обидалари ҳамда бетакрор табиати акс эттирилган видеороликлар Кедах штати ва Ланкави оролининг марказий кўчаларидаги реклама экранларида 3 ой давомида намойиш этилади.