МАТТАЛА, 30 октябрь. /“Дунё” АА/. “Centrum Air” авиакомпанияси Тошкент ва Шри-Ланканинг Маттала шаҳри ўртасида илк тўғридан-тўғри авиақатновни йўлга қўйиб, Ўзбекистоннинг Жанубий Осиё билан транспорт алоқаларини янада кенгайтирди, деб хабар бермоқда “Дунё” АА мухбири.

28 октябрь куни маҳаллий вақт билан соат 17:30 да Маттала Ражапакса халқаро аэропортида илк парвоз билан 160 нафар йўловчи кутиб олинди. Йўналиш очилиши муносабати билан халқаро авиация тартиб-таомилларига мувофиқ, биринчи парвоз сув аркаси орқали кутиб олиниб, расмий маросим ташкил этилди.

Авиақатновнинг йўлга қўйилиши Ўзбекистоннинг Исломободдаги элчихонаси ҳамда “Centrum Air” авиакомпаниясининг Шри-Ланкадаги тегишли ташкилотлар билан олиб борган музокаралари самараси бўлди.

Мезбон томон вакиллари “Тошкент–Маттала–Тошкент” тўғридан-тўғри йўналиши очилгани учун миннатдорлик билдирди.

Янги ҳаво йўналиши икки давлат ўртасидаги транспорт боғлиқлигини мустаҳкамлаш, савдо, инвестиция ва туризм имкониятларини кенгайтиришга хизмат қилади. Шунингдек, бу авиақатнов Шри-Ланка ва Марказий Осиё мамлакатлари ўртасида Ўзбекистон орқали янада қулай авиақатновни таъминлайди.

“Тошкент–Маттала–Тошкент” йўналиши бўйича тўғридан-тўғри авиақатновлар 2027 йил март ойи охирига қадар ҳафтасига икки марта – чоршанба ва шанба кунлари амалга оширилади.