БЕРЛИН, 4 февраль. /“Дунё” АА/.  Германиянинг нуфузли «Fussballfieber» спорт нашри 2026 йили океан орти мамлакатларида бўлиб ўтадиган Жаҳон чемпионатининг дебютантлари ҳақида мақола эълон қилди, деб хабар бермоқда “Дунё” АА мухбири.

Нашрнинг қайд этишича, АҚШ, Канада ва Мексика мезбонлик қиладиган навбатдаги мундиаль рекордлар турнири бўлади: 48 иштирокчи, 104 та ўйин ва 4 та янги жамоа — Ўзбекистон, Кюрасао, Иордания ва Кабо-Верде. Немис матбуоти дебютантлар орасида Ўзбекистон миллий терма жамоасига алоҳида тўхталган.

Мақолада “Оқ бўрилар”нинг Жаҳон чемпионатига йўл олиши тарихий воқеа сифатида баҳоланган. Хусусан, 2025 йил 5 июнь санаси ўзбек футболи тарихига зарҳал ҳарфлар билан ёзилгани, Темур Кападзе бошчилигида БААга қарши кечган (0:0) учрашув Ўзбекистонни мундиалга олиб чиққани таъкидланади. Шу билан Ўзбекистон Марказий Осиёдан Жаҳон чемпионати йўлланмасини қўлга киритган биринчи давлатга айланди.

Германиялик журналистлар Ўзбекистонда футболга давлат даражасида кўрсатилаётган эътиборни алоҳида эътироф этган. Давлатимиз раҳбари Шавкат Мирзиёев томонидан футболчиларнинг фахрий унвонлар, орденлар ва совғалар билан тақдирланиши немис ўқувчиларида катта қизиқиш уйғотган.

Терма жамоага 2006 йилги Жаҳон чемпиони Фабио Каннаваронинг мураббий этиб тайинланиши жамоа ўйинини янги босқичга олиб чиқиши мумкинлиги таъкидланган.

21 ёшли Абдуқодир Ҳусановнинг Англия Премьер-лигасида Пеп Гвардиола қўл остида тўп сураётган илк ўзбек футболчиси экани алоҳида қайд этилиб, Ўзбекистон ҳимояси ЖЧ–2026да “темир панжара” бўлиши мумкинлиги айтилган.

Мундиалнинг “К” гуруҳида Ўзбекистонни Криштиану Роналду бошчилигидаги Португалия ва Колумбияга қарши мураккаб имтиҳон кутмоқда. Немис нашрининг хулосасига кўра, Каннаваронинг тактик билими ва футболчиларнинг халқаро тажрибаси “Оқ бўрилар”ни ЖЧ-2026нинг энг хавфли дебютантига айлантириши мумкин.