ВАШИНГТОН, 11 ноябрь. /“Дунё” АА/. АҚШ Вакиллар палатаси мудофаа (“уруш”) вазири Пит Ҳегсетнинг Эронга қарши, Яман, Венесуэла ва Кариб ҳавзаси мамлакатларидаги ҳарбий амалиётлар чоғидаги хатти-ҳаракатлари билан боғлиқ импичмент ташаббусини рад этди, деб хабар бермоқда “Дунё” АА мухбири “NBC News” телеканалига таяниб.

Конгрессменлар 204га қарши 211 овоз билан импичмент тўғрисидаги резолюцияни соҳавий қўмита кўриб чиқишига топширишни маъқуллаб, амалда унинг кейинги ҳаракатини тўхтатиб қўйди.

Ташаббус муаллифи сифатида Дональд Трамп маъмуриятини танқид қилиб келган Кентукки штатидан республикачи Томас Масси чиқди. У Пентагон раҳбарини уруш олиб бориш меъёрларини бузганликда айблаб, унинг ҳаракатлари АҚШ обрўсига путур етказаётгани ҳамда келажакдаги можароларда америкалик ҳарбий хизматчиларни хавф остида қолдираётганини билдирди. Шунингдек, у резолюцияни илгари суриш учун демократлар билан бирга овоз берган ягона республикачига айланди.

Вакиллар палатасидаги демократик озчилик етакчиси, Нью-Йорк штатидан сайланган Ҳаким Жеффрис демократлар келаси йили Конгресс устидан назоратни қўлга киритгач, Пит Ҳегсетнинг лавозимидан кетишига эришишини таъкидлади.

Овоз бериш жараёни фонида Америка ОАВлари Дональд Трамп оралиқ сайловларда республикачилар мағлубиятга учраганидан сўнг вазирни истеъфога чиқариш эҳтимолини кўриб чиқаётгани ҳақида хабар берди. Бироқ кейинчалик президент омма олдида Ҳегсетни қўллаб-қувватлаб, унинг фаолиятига юқори баҳо берди. Пентагон раҳбарининг ўзи эса айбловларни сиёсий томоша деб атади ва ўтказилган ҳарбий амалиётлардан афсусда эмаслигини маълум қилди.

Демократлар ҳар иккала палатани назорат қиладиган Конгресснинг янги таркиби 2027 йил 3 январда ўз ишини бошлайди. Бу ҳолат импичментга қайта уриниш учун замин яратиши мумкин, бироқ вазирни лавозимидан узил-кесил четлатиш учун Сенат аъзоларининг учдан икки қисми қўллаб-қувватлаши талаб этилади.

“AP” агентлиги сурати