АРУША, 6 октябрь. /«Дунё» АА/. Жорий йилнинг 5 октябрь куни Танзаниянинг Аруша шаҳрида Парламентлараро иттифоқ (ПИ)нинг 153-Ассамблеяси ўз ишини бошлади, деб хабар бермоқда “Дунё” АА мухбири.

Парламентимиз юқори палатаси маълумотига кўра, Танзания Миллий ассамблеяси мезбонлигида ташкил этилган нуфузли тадбирда дунёнинг 180 дан зиёд мамлакатларидан 2 мингдан ортиқ парламентларнинг спикерлари, депутатлари ва халқаро ташкилотлар вакиллари иштирок этмоқда.

Ассамблея ишида Олий Мажлис Сенати раиси Танзила Нарбаева бошчилигидаги Ўзбекистон парламенти делегацияси ҳам қатнашмоқда.

Тадбирнинг бош мавзуси – “Инклюзивлик, ишонч ва барча учун имкониятлар орқали самарали бошқарувни такомиллаштириш ҳамда жамиятлар имкониятларини кенгайтириш”.

Ассамблея ва ялпи мажлислар доирасида инклюзив ижтимоий ривожланиш, инсон ҳуқуқларини таъминлаш, сунъий интеллектдан фойдаланиш, иқлим ўзгариши, озиқ-овқат хавфсизлиги, ногиронлиги бўлган шахслар ҳуқуқларини ҳимоя қилиш ҳамда терроризмга қарши курашиш каби глобал ва минтақавий аҳамиятга эга долзарб масалалар муҳокама қилинади.

Ассамблея доирасида Парламентлараро иттифоқнинг янги президентини сайлаш ҳам назарда тутилган.