ВАШИНГТОН, 2 ноябрь. /“Дунё” АА/. 3 ноябрь куни АҚШда Конгрессга оралиқ сайловлар ўтказилиб, унда америкаликлар Вакиллар палатасининг барча 435 нафар аъзоси ва 35 нафар сенаторни сайлайди, деб хабар бермоқда “Дунё” АА мухбири.

Сайловлар Республикачилар партияси қонун чиқарувчи органдаги кўпчилик ўринни сақлаб қолиш-қолмаслигини белгилаб беради. Овоз бериш натижалари Президент Дональд Трампнинг ўз сиёсатини юритиш имкониятларига таъсир кўрсатади.

Агар республикачилар ҳеч бўлмаганда битта палатада устунликни бой берса, демократлар учун Оқ уй ташаббусларини тўхтатиб қўйиш ва маъмурият фаолиятини назорат қилиш осонроқ кечади.

Республикачилар Дональд Трампнинг иқтисодий сиёсати, солиқларни камайтириш, жиноятчиликка қарши курашиш ва миграция назоратини кучайтиришга таянмоқда. Ташқи сиёсат масалаларида партия АҚШ миллий манфаатларининг устуворлиги ҳамда халқаро харажатларни қатъийроқ назорат қилиш тарафдори.

Демократлар эса асосий эътиборни яшаш харажатларини камайтириш, уй-жой ва тиббий хизматлардан фойдаланиш имкониятини ошириш, фуқаролик ҳуқуқларини ҳимоя қилиш ҳамда президент маъмурияти устидан парламент назоратини кучайтиришга қаратган. Шунингдек, улар Украина, Исроил ва Тайванга ҳарбий ёрдам кўрсатишни давом эттиришни ёқламоқда.

Вакиллар палатаси учун асосий кураш Виржиния, Пенсильвания, Нью-Йорк, Техас, Огайо ва Мичиган штатларидаги рақобат кучли бўлган округларда кечиши кутилмоқда. Сенатга сайловларда 1988 йилдан буён демократлар ғалаба қозона олмай келаётган Техас штати алоҳида эътиборни тортмоқда.

Кўпчилик ўринни сақлаб қолиш республикачиларга Дональд Трамп дастурини амалга оширишни давом эттириш имконини беради. Агар бир ёки иккала палата устидан назорат демократлар қўлига ўтса, президент қонунларни қабул қилиш ҳамда ички ва ташқи сиёсий ташаббусларни рўёбга чиқаришда янада жиддийроқ қаршиликка дуч келади.

Шу тариқа, оралиқ сайловлар америкаликларнинг амалдаги маъмурият сиёсатига бўлган муносабатининг муҳим кўрсаткичига айланади ва 2028 йилда бўлиб ўтадиган навбатдаги президентлик сайловларига қадар Вашингтондаги кучлар нисбатини белгилаб беради.

“AP” агентлиги сурати