МОСКВА, 10 июль. /“Дунё” АА/. Ўзбекистон Президенти Шавкат Мирзиёевнинг 8–9 июль кунлари Беларусга қилган расмий ташрифи ҳақида Россиянинг етакчи оммавий ахборот воситаларида қатор мақолалар эълон қилинди, деб хабар бермоқда “Дунё” АА мухбири.

 Хусусан, “Российская газета”нинг ёзишича, 8 июль куни Ўзбекистон Президенти Минскка ташриф буюрди. Уни Беларусь Бош вазири Александр Турчин, Ташқи ишлар вазирлиги раҳбари Максим Риженков ва бошқа расмий шахслар кутиб олди.

Анъанага кўра, меҳмон Ғалаба ёдгорлиги пойига гулчамбар қўйди. Делегацияларнинг расмий музокаралари 9 июль куни бўлиб ўтди. Кун тартибидан Ўзбекистонда Беларусь маҳсулотларини саноат йўсинида йиғиш, озиқ-овқат ва саноат товарларини ўзаро етказиб бериш, маданият, таълим, фан ва технологиялар, сунъий интеллект ва АКТ соҳаларидаги ҳамкорлик масалалари ўрин олди.

“МИР24” телеканалининг хабар беришича, расмий музокаралар арафасида Беларусь Президенти Александр Лукашенко Шавкат Мирзиёевни ўз қароргоҳида қабул қилди. Президент Шавкат Мирзиёев Беларусь етакчисининг 2024 йилда Ўзбекистонга қилган тарихий ташрифидан сўнг мамлакатлар ўртасидаги муносабатлар янги босқичга кўтарилгани, бош вазирлар, вазирлар ва парламентлар даражасида мунтазам алоқалар йўлга қўйилганини таъкидлади.

Шунингдек, Тошкент ва Минск савдо-саноат палаталари томонидан ташкил этилган Ўзбекистон савдо уйининг Минскдаги очилиш маросими ҳам кенг ёритилди.

“Российская газета” ва “МИР24” медиа-ресурси маълумотларига кўра, маросимда икки мамлакат бош вазирлари ўринбосарлари иштирок этган. Ўзбекистон Савдо-саноат палатаси раиси Даврон Ваҳобов Савдо уйида Ўзбекистонда ишлаб чиқарилган электротехника, уй тўқимачилиги ва бошқа енгил саноат маҳсулотлари намойиш этилгани, ушбу объект эса ишбилармон доираларнинг тўғридан-тўғри алоқалари ва қўшма корхоналар яратиш учун муҳим аҳамиятга эга бўлганини қайд этди.