АР-РИЁЗ, 6 февраль. /“Дунё” АА/. Саудия Арабистонида чўлнинг катта қисмини кенг кўламли сайёҳлик майдонига айлантирган улкан “Six Flags Qiddiya City” парки очилди, деб хабар қилмоқда “Дунё” АА мухбири.

“Naked-science” сайтида ёзилишича, ушбу “Six Flags Qiddiya City” улкан Qiddiya лойиҳасининг бир қисми бўлиб, унинг мақсади Арабистон чўлининг катта ҳудудини дунёдаги энг йирик кўнгилочар ва туризм марказларидан бирига айлантиришдир.

Мажмуа мамлакат пойтахти Ар-Риёз яқинида жойлашган бўлиб, келажакда у ерда киберспорт аренаси, стадион ва аквапарк ҳам бўлиши режалаштирилган.

Ушбу лойиҳани қуриш тахминан тўрт йил давом этган, мажмуа майдони эса қарийб 32 гектарни ташкил қилади. Бу ҳудудда ресторанлар, савдо зоналари ва, албатта, аттракционлар жойлашган.

Боғда жами 28 та аттракцион мавжуд бўлиб, улардан учтаси аллақачон рекордчи сифатида тарихга кирган. Улардан энг машҳури “Falcon’с Flight” – дунёдаги энг баланд, тез ва узун бўлган Америка тепаликлари ҳисобланади. Улар соатига 250 километр тезликда ҳаракатланади. Шунингдек, “Iron Rattler” ва “Spitfire” аттракционлари ҳам кишини ҳайратда қолдиради.