БЕЛГРАД, 7 сентябрь. /“Дунё” АА/. Сербиянинг оммабоп “SrpskiPogled” ахборот-аналитик порталида Ўзбекистон Президентининг Белградга бўлажак ташрифига бағишланган мақола чоп этилди, деб хабар бермоқда “Дунё” АА мухбири.

Нашрда таъкидланишича, Ўзбекистон Президенти Шавкат Мирзиёевнинг Сербияга бўлажак расмий ташрифи Ташкент ва Белград ўртасидаги муносабатларни ривожлантиришда муҳим қадам бўлиб, сиёсий мулоқотни мустаҳкамлаш, иқтисодий, инвестициявий, транспорт, таълим ва гуманитар лойиҳаларни амалга ошириш учун янги имкониятлар очади.

Икки мамлакат ўртасидаги муносабатлар Сербия томонидан Ўзбекистон мустақиллиги 1991 йил 31 декабрда тан олиниши ва 1995 йил 18 январда дипломатик алоқалар ўрнатилиши билан бошланган. Сўнгги йилларда, айниқса 2025 йилдан эътиборан ушбу алоқалар янги суръат олди. Президентлар Шавкат Мирзиёев ва Александар Вучичнинг 2025 йил сентябрь ойида Пекиндаги учрашуви ҳамда Сербия раҳбарининг шу йил октябрь ойида Ўзбекистонга амалга оширган илк расмий ташрифи муҳим шартномалар имзоланиши билан тарихий аҳамият касб этди.

Таъкидланишича, ҳозирда мавжуд 12 миллион долларлик товар айланмаси ва Ўзбекистондаги 9 та серб капитали иштирокидаги корхона икки мамлакат иқтисодиётининг аслида мавжуд бўлган реал салоҳиятини акс эттирмайди. Ўзбекистон тўқимачилик, кимё, озиқ-овқат ва машинасозлик каби соҳаларда жадал ўсиб бораётган саноат базасига эга. Сербия эса бой ишлаб чиқариш тажрибаси ва Европа Иттифоқи бозорига имтиёзли кириш имкониятига эга бўлиб, бу учинчи мамлакатлар бозорларига йўналтирилган қўшма ишлаб чиқаришларни ташкил этиш учун кенг истиқболлар очади.

Иқтисодий ҳамкорлик контекстида кичик ҳажмдаги савдодан узоқ муддатли саноат ва инвестициявий шерикликка ўтиш устувор вазифа сифатида кўрсатилган. Ўзбекистон экспорти турларини кенгайтириш ва қўшилган қиймати юқори бўлган маҳсулотлар улушини ошириш бунга амалий замин яратади. Бундан ташқари, Тошкент ва Белград ўртасида тўғридан-тўғри авиақатновларни йўлга қўйиш орқали транспорт боғлиқлигини таъминлаш бизнес, туристик ва гуманитар алмашинувларни сезиларли даражада енгиллаштиради.

Меҳнат миграцияси соҳаси ҳам юқори салоҳиятга эга йўналиш сифатида эътироф этилган. Таълим ва фан соҳасида ўзбекистонлик талабаларнинг “Мир в Сербии” дастуридаги иштирокини кенгайтириш, шунингдек, муҳандислик, ахборот технологиялари ва амалий фанлар бўйича университетлараро ҳамкорликни ривожлантириш имкониятлари кўрсатиб ўтилган.

Бундан ташқари, туризм, кинематография ва маданият соҳаларидаги алоқаларни чуқурлаштириш сиёсий муносабатларга қўшимча туртки беради. Қайд этилганидек, сиёсий ва институционал пойдевор аллақачон мустаҳкамланган, эндиги вазифа ушбу имкониятларни икки мамлакат бизнес вакиллари ва фуқаролари учун манфаатли бўлган динамик шерикликка айлантиришдан иборатдир.