ВАШИНГТОН–ТЕҲРОН, 20 июль. /“Дунё” АА/. АҚШ тўққиз кундан буён Эронга ҳужум қилмоқда, Теҳрон эса Америка объектларига зарбалар билан жавоб қайтариб, Ҳўрмуз бўғозида янги ҳодисалар содир бўлаётгани ҳақида хабар қилмоқда, деб хабар бермоқда “Дунё” АА мухбири “Reuters” агентлигига таяниб.

АҚШ Қуролли кучлари тунда Эрон ҳудудига янги зарбалар тўлқинини бошлади. Марказий қўмондонликнинг баёнотига кўра, операция Эроннинг ҳарбий салоҳиятини янада заифлаштириш ва Ҳўрмуз бўғозида кемаларга уюштирилаётган ҳужумларнинг олдини олишга қаратилган.

Эроннинг “Tasnim” ахборот агентлиги маълумотларига кўра, Америка ракеталари мамлакатнинг бир нечта шаҳрига, жумладан, Табриз, Чобаҳор, Конарак, Бандар-Маҳшаҳр ва Бандар-Имом-Хумайнийга зарба берган.

АҚШ Давлат котиби Марко Рубио Вашингтон Эрон халқаро кемачиликка ҳужум қилишда давом этар экан, зарбалар беришни давом эттиришини айтди. Шу билан бирга, у АҚШ дипломатик ечим учун ҳамон очиқ эканини таъкидлади.

Бунга жавобан, Ислом инқилоби посбонлари корпуси (ИИПК) Суриянинг Ат-Танф ҳудудидаги, Иорданиянинг Ақаба аэропортидаги Америка объектларига, Қувайтдаги Кемп-ал-Адири ва Али-ал-Салим базаларига зарбалар берилганини маълум қилди. Қувайт ҳукумати сувни чучуклаштирувчи иншоот кетма-кет иккинчи кун ҳужумга учрагани ва бунинг натижасида ёнғин келиб чиққанини билдирди.

Шунингдек, ИИПК Ҳўрмуз бўғозида иккита нефть танкери портлаб, ҳаракатдан тўхтаганини маълум қилди. Бу маълумотнинг мустақил тасдиғи ҳозирча йўқ, бироқ ОАВ маълумотларига кўра, бир кун аввал бўғоздан саккизта кема ўтган бўлса, бугун уларнинг сони тўрттага етган.

“The Washington Post” нашри америкалик мулозимларга таяниб хабар беришича, Иорданияда америкалик ҳарбийлар ҳалок бўлганидан сўнг, Пентагон Эронга қарши ҳарбий кампанияни кенгайтириш имкониятини кўриб чиқмоқда. Айни пайтда, нашр манбалари операциялар кўлами ҳаво ҳужумидан мудофаа воситалари ва узоқ масофали ўқ-дорилар танқислиги ҳамда техниканинг жанговар шикастланишлари туфайли чекланиши мумкинлигини қайд этган.

АҚШ Марказий қўмондонлиги маълумотларига кўра, можаро бошланганидан бери 17 нафар америкалик ҳарбий хизматчи ҳалок бўлган, 420 дан ортиғи яраланган.