ВАШИНГТОН, 4 сентябрь. / “Дунё” АА/. АҚШнинг нуфузли “The National Interest” таҳлилий нашрида Ўзбекистоннинг АҚШдаги элчиси Фурқат Сидиқов билан мамлакатимиз мустақиллигининг 35 йиллиги, Янги Ўзбекистон трансформацияси ҳамда ўзбек-америка стратегик шериклигини янада чуқурлаштириш истиқболларига бағишланган интервью чоп этилди, деб хабар бермоқда “Дунё” АА мухбири.

Ушбу нашр “Center for the National Interest” етакчи эксперти Эндрю Качинс томонидан тайёрланган. Мулоқот давомида Ўзбекистондаги ислоҳотлар, хусусий секторни ривожлантириш, АҚШ билан инвестициявий ва технологик ҳамкорлик, муҳим минераллар, минтақавий хавфсизлик ва Марказий Осиёдаги ҳамкорлик истиқболларига алоҳида эътибор қаратилган.

Қайд этилишича, 35 йиллик мустақиллик даврида Ўзбекистон салмоқли йўлини босиб ўтди ва сўнгги йилларда мамлакат ривожланишнинг сифат жиҳатидан янги босқичига қадам қўйди. Мамлакатимиз элчисининг сўзларига кўра, бугунги кунда Янги Ўзбекистон концепцияси Ўзбекистоннинг чуқур трансформациясини, унинг дунёга янада очиқлигини, тадбиркорлик имкониятлари кенгайганини, давлат хизматлари сифати ошганини, таълим ривожланишини ҳамда ёшларнинг иқтисодий ва ижтимоий ҳаётдаги фаол иштирокини акс эттиради.

Нашрнинг салмоқли қисми бугунги кунда кенгайтирилган стратегик шериклик даражасига кўтарилган ўзбек-америка муносабатлари динамикасига бағишланган. Таъкидланганидек, Ўзбекистон Президенти Шавкат Мирзиёев ва АҚШ Президенти Дональд Трамп ўртасидаги сиёсий мулоқот ҳозирги ижобий динамиканинг муҳим омили ҳисобланади. Олий даражада эришилган келишувлар аниқ иқтисодий мазмун билан бойитилди. Хусусан, Америка-Ўзбекистон бизнес ва инвестиция кенгаши, шунингдек, АҚШнинг Халқаро молиявий тараққиёт корпорацияси (DFC), АҚШ Экспорт-импорт банки (EXIM) ва Ўзбекистон Тикланиш ва тараққиёт жамғармаси иштирокида қўшма инвестиция платформаси ташкил этилгани алоҳида қайд этилган.

Интервьюда хусусий секторни ривожлантириш ва Ўзбекистондаги инвестиция муҳитини яхшилаш масалаларига ҳам алоҳида тўхталиб ўтилган. Амалга оширилаётган ислоҳотлар иқтисодиётда давлат иштирокини қисқартириш, хусусий инвестициялар учун имкониятларни кенгайтириш ва инвесторлар ҳуқуқлари ҳимоясини мустаҳкамлашга қаратилган. Ушбу ўзгаришларнинг муҳим элементи ҳуқуқий тизими инглиз умумий ҳуқуқига асосланадиган Тошкент халқаро молия маркази бўлади.

Интервьюнинг алоҳида блоки янги глобал етказиб бериш занжирларини шакллантириш шароитида тобора катта аҳамият касб этаётган муҳим минераллар соҳасидаги ҳамкорликка бағишланган. Фурқат Сидиқов таъкидлаганидек, бу соҳада икки мамлакат манфаатлари бир-бирини тўлдиради. АҚШ муҳим материаллар манбаларини диверсификация қилишдан манфаатдор бўлса, Ўзбекистон илғор технологиялар ва инвестицияларни жалб этиш, қайта ишлашни кенгайтириш ва янги бозорларга чиқишдан манфаатдор. Ҳамкорликнинг муҳим таркибий қисми кадрлар тайёрлашдир. АҚШнинг “Colorado School of Mines” институти билан биргаликда Тошкентдаги Геология фанлари университети ҳузурида Геология, кончилик иши ва муҳим минераллар соҳасида илғор тажриба марказини ташкил этиш бўйича ишлар олиб борилмоқда.

Шунингдек, суҳбатда Ўзбекистоннинг минтақавий ўзаро боғлиқликни ривожлантиришдаги ортиб бораётган роли қайд этилган. Самарқандда “C5+1” форматидаги ташқи ишлар вазирларининг бўлажак учрашуви савдо, транспорт, энергетика ва минтақавий хавфсизлик соҳаларида амалий ҳамкорликни кенгайтириш имконияти сифатида кўриб чиқилмоқда. Шу билан бирга, Афғонистонни яккалаб қўйишга йўл қўймаслик, инсонпарварлик ёрдами кўрсатиш ва уни минтақавий транспорт, энергетика ҳамда инфратузилма лойиҳаларига жалб этишни назарда тутувчи ёндашув баён этилган.

Нашрда Ўзбекистон миллий терма жамоасининг 2026 йилги футбол бўйича жаҳон чемпионатига тарихий чиқишига алоҳида эътибор қаратилган. Элчининг сўзларига кўра, спортдаги муваффақият нафақат миллий ғурур манбаи, балки мамлакатнинг халқаро майдонда танилишини оширишнинг муҳим омилига айланди. Туризм қўмитаси маълумотларига кўра, “Google”да мамлакатнинг ЖЧдаги иштироки билан боғлиқ Ўзбекистонга бўлган қизиқиш ва қидирувлар 450 фоизга ошган, турнир доирасидаги туристик кампания эса 1,07 миллиарддан ортиқ медиа намойишини таъминлаган. “Биз учун жаҳон чемпионати шунчаки спорт ютуғидан жуда катта аҳамиятга эга бўлди. У одамларни бирлаштирди ва янги дўстлик алоқалари учун эшикларни очди”, - деди Фурқат Сидиқов.

Умуман олганда, ушбу интервьюнинг чоп этилиши кенг америкалик эксперт-сиёсий аудиторияга Янги Ўзбекистон ютуқлари ва ислоҳотларнинг асосий устувор йўналишларини тақдим этиш, эришилган юқори даражадаги стратегик шерикликни намойиш этиш ҳамда мамлакатнинг минтақавий ва халқаро кун тартибидаги долзарб масалалар бўйича позициясини етказиш имконини берди.