ГУАНЧЖОУ, 23 сентябрь. /"Дунё" АА/. Ўзбекистон Енгил саноатни ривожлантириш агентлиги делегациясининг Гуандун ва Фуцзянь провинцияларига амалий ташрифи ташкил этилди, деб хабар бермоқда "Дунё" АА мухбири.

Ташриф доирасида Гуанчжоу, Шэньчжэнь ва Сямэнь шаҳарларида Хитойнинг тўқимачилик саноати корхоналари, тармоқ уюшмалари ва бизнес тузилмалари вакиллари билан қатор учрашувлар, давра суҳбатлари ҳамда музокаралар ташкил этилди.

Хусусан, "Home Textile and Home Decoration Association" ва "Luohu Enterprises Overseas Service Platform" уюшмалари билан ҳамкорликда 20 дан ортиқ маҳаллий компания иштирокида ўтказилган бизнес-форумларда Ўзбекистоннинг тўқимачилик ва чарм саноати ривожланиш истиқболлари, мамлакатда яратилган қулай инвестициявий муҳит, экспорт имкониятлари ва хорижий инвесторлар иштирокида амалга ошириш учун таклиф этилаётган лойиҳалар ҳақида батафсил маълумот берилди.

Делегация аъзоларининг "Shenzhen Chuxing Hengji Textile", "Guangzhou Yuanzhicheng Home Textile", "Elassay Group", "Guangdong Hengshen Meida New Materials" каби 10 га яқин етакчи компаниялар раҳбарияти билан ўтказилган музокараларида кооперация асосида қўшма ишлаб чиқаришни йўлга қўйиш, миллий маҳсулотлар учун янги буюртмачилар ва бозорларни аниқлаш механизмларини ишлаб чиқишга келишиб олинди.