ЧАНША, 22 сентябрь. /"Дунё" АА/. Тошкент вилояти ҳокими Зойир Мирзаев бошчилигидаги мамлакатимиз делегациянинг Хитойга ташрифи доирасида Хунань провинциясида қатор тадбирлар ўтказилди, деб хабар бермоқда "Дунё" АА мухбири.

Хусусан, делегация аъзолари провинциянинг етакчи "HNAC-Technology", "Sansure Biotech" ва "Suntown Technology" компанияларига ташриф буюриб, уларнинг энергетика, биотехнология ва озиқ-овқат саноатидаги фаолияти ҳамда юқори технологик маҳсулотларни ишлаб чиқариш жараёнлари билан танишдилар.

"PK Environment" ва "Hunan Construction Investment Group" компаниялари раҳбарияти билан оқава сувларни қайта ишлаш ҳамда йирик инфратузилма лойиҳаларини ишлаб чиқиш истиқболлари муҳокама қилинди.

Шунингдек, Хунань, Гуандун ва Фуцзянь провинцияларида фаолият юритаётган 20 га яқин компания вакиллари иштирокида ташкил этилган давра суҳбатида Тошкент вилоятининг саноат ва инвестициявий салоҳияти, ҳудудда яратилган қулай бизнес муҳити ҳамда хорижий инвесторлар иштирокида амалга ошириш учун таклиф этилаётган истиқболли лойиҳалар тақдим этилди.

Музокаралар якунида қайд этилган компанияларнинг Тошкент вилоятига бизнес-миссияларини амалга ошириш бўйича келишувга эришилди.