ЛОНДОН, 25 октябрь. /“Дунё” АА/. Мамлакатимиз дипломатлари “Hamroh” ўзбек компанияси ва “SteelRose Legal” халқаро юридик фирмаси асосчиси Зулайҳо Тўхтаева ўртасида онлайн учрашув ташкил этди, деб хабар бермоқда “Дунё” АА мухбири.

Учрашувда “Hamroh” компаниясининг халқаро инвестициялар ва стратегик шериклик бўйича бош директори ўринбосари Сардор Юсупов ҳамда Лондонда фаолият юритувчи юрист, тадбиркор ва инвестор Зулайҳо Тўхтаева иштирок этди.

Қатнашчиларга “Hamroh” компаниясининг асосий фаолият йўналишлари, мақсадлари ва Ўзбекистонда хотин-қизларнинг тадбиркорлик ташаббусларини қўллаб-қувватлаш борасида амалга оширилаётган чора-тадбирлар таништирилди.

Ўз навбатида, корпоратив, тижорат ва молиявий ҳуқуқ, солиқ масалалари ҳамда халқаро савдо муносабатларига ихтисослашган “SteelRose Legal” компанияси раҳбари Зулайҳо Тўхтаева ўз фаолияти ҳақида сўзлаб берди. У, шунингдек, ёш аёлларни қўллаб-қувватлаш, устозлик қилиш ва етакчилик кўникмаларини ривожлантириш бўйича ташаббусларини тақдим этди.

Томонлар икки ташкилотнинг мақсадлари яқинлигини ҳамда аёлларнинг бизнес ташаббусларини қўллаб-қувватлаш, уларнинг касбий салоҳиятини ошириш ва корхоналарининг барқарор ривожланишига кўмаклашиш борасида тажриба алмашиш имкониятлари мавжудлигини қайд этдилар.