ВЕНА, 10 октябрь. /“Дунё” АА/. Австрия ва Европа молия институтлари Ўзбекистоннинг “Ипак Йули” банкига кичик ва ўрта бизнесни ривожлантириш, хотин-қизлар тадбиркорлигини қўллаб-қувватлаш ҳамда экологик лойиҳаларни молиялаштириш учун 80 миллион АҚШ доллари миқдорида маблағ ажратади, деб хабар бермоқда “Дунё” АА мухбири.

Бу ҳақда Австриянинг ихтисослаштирилган “Extrajournal.Net” онлайн нашри Халқаро “CMS” юридик фирмасининг мазкур битимни ҳуқуқий жиҳатдан қўллаб-қувватлашига бағишланган мақоласида маълум қилди.

Молиялаштириш жараёнида “CMS” учта молия институти — Австрия тараққиёт банки (“Oesterreichische Entwicklungsbank AG”), Италиянинг “Cassa Depositi e Prestiti S.p.A.” ташкилоти ва “Allianz Global Investors” бошқарувидаги “Allianz Credit Emerging Markets Fund” фондининг етакчи юридик маслаҳатчиси сифатида иш юритди.

Нашрда қайд этилишича, маблағларнинг 35 фоизини хотин-қизларга тегишли корхоналарга, яна 30 фоизини эса “яшил” лойиҳалар ва экологик барқарор ташаббусларга йўналтириш кўзда тутилган.

“CMS”нинг Вена офиси етакчи ҳамкори Марселл Кларк мазкур битим халқаро молия институтлари ва инвесторларнинг Ўзбекистон хусусий секторининг барқарор ривожланишига бўлган қизиқиши кучайиб бораётганини кўрсатишини таъкидлади.

Мазкур молиялаштириш ўзбек корхоналарининг кредит ресурсларидан фойдаланиш имкониятларини кенгайтиради, хотин-қизлар тадбиркорлигини ривожлантириш ҳамда бизнесда экологик барқарор ечимларни жорий этишга хизмат қилади.