АШХОБОД, 29 июнь. /“Дунё” АА/. Ўзбекистоннинг Туркманистондаги элчихонаси ташаббуси билан Ашхободда Ўзбекистон миллий терма жамоасининг Конго Демократик Республикасига қарши учрашуви катта экран орқали намойиш қилинди, деб хабар бермоқда “Дунё” АА мухбири.

Томоша Ўзбекистон ва Туркманистон халқлари ўртасидаги кўп йиллик дўстлик ва яхши қўшничилик рамзи бўлган “Тошкент” боғи ҳамда унинг ҳудудида жойлашган айни номдаги ресторанда бўлиб ўтди.

Учрашув эрта тонгда бошланганига қарамасдан, тадбирда дипломатик ваколатхоналар раҳбарлари, халқаро ташкилотлар вакиллари, Туркманистонда истиқомат қилаётган ватандошларимиз ҳамда маҳаллий жамоатчилик вакиллари фаол иштирок этди.

Мухлислар бутун учрашув давомида Ўзбекистон миллий терма жамоасини қизғин қўллаб-қувватлаб, стадион муҳитига хос самимий ва кўтаринки кайфиятни яратдилар.

Тадбир қатнашчилари бундай спорт тадбирлари Ўзбекистон ва Туркманистон ўртасидаги дўстлик ва ўзаро яқинликни ривожлантиришга хизмат қилишини таъкидладилар.

Учрашув якунида иштирокчилар Ўзбекистон терма жамоаси футболчиларига янги спорт ютуқлари, ёрқин ғалабалар ва бўлажак халқаро мусобақаларда муваффақиятли иштирок этишларини тиладилар.