ТОШКЕНТ, 27 июль. /“Дунё” АА/. Остонага “Келажак ўйинлари – 2026” халқаро турнири иштирокчилари етиб кела бошлади, деб хабар бермоқда “Дунё” АА мухбири.

“Kazinform ” халқаро ахборот агентлиги маълумотларига кўра, яқин кунларда Қозоғистон пойтахти 800 дан ортиқ спортчини, жумладан, киберспорт ва фижитал йўналишлари бўйича дунёнинг энг кучли жамоаларини қабул қилади.

Остонага биринчи бўлиб “Halyk Fund” томонидан тақдим этилган фижитал-баскетбол бўйича “Phygital Basketball Presented by Halyk Fund” турнири иштирокчилари етиб келди. Улар орасида “MINSK”, “Zagrebacki malisani NITUI”, “Vozdovac Belgrad”, “Dangerous Meridianbet”, “Flow Game Basketball” ва “Boca Juniors” каби жамоалар бор.

Қозоғистон пойтахтидаги спорт объектларида мусобақаларни ўтказишга тайёргарлик якунланмоқда. Беллашувлардан ташқари, иштирокчилар ва томошабинлар учун интерактив ҳудудлар ҳамда технологик майдончалар ташкил этилади.

“Келажак ўйинлари – 2026” Остонада 29 июлдан 9 августгача бўлиб ўтади. Мусобақа дастурига жисмоний ва рақамли спорт форматини ўзида мужассам этган саккизта йўналиш киритилган.

Илк турнир 2024 йилда Қозонда бўлиб ўтган эди. 2025 йилда эса ўйинлар Абу-Дабида ўтказилган.

“Kazinform” ХАА фотосурати