АЛ-КУВАЙТ, 14 октябрь. /“Дунё” АА/. Ўзбекистон элчиси Аюбхон Юнусов Ироқнинг Кувайтдаги янги тайинланган элчиси Усама аль-Наши билан учрашди, деб хабар бермоқда “Дунё” АА мухбири.

Мулоқот чоғида томонлар дўстона муносабатларни мустаҳкамлаш, сиёсий мулоқотни фаоллаштириш ҳамда савдо-иқтисодий, инвестициявий, транспорт-логистика ва туризм соҳаларида ҳамкорликни кенгайтириш масалаларини муҳокама қилдилар. Хусусан, юқори даражадаги ўзаро ташрифларни ташкил этиш ва ташқи сиёсат идоралари ўртасидаги алоқаларни давом эттиришга алоҳида эътибор қаратилди.

Савдо-иқтисодий алоқаларни ривожлантириш мақсадида 2027 йилнинг биринчи чорагида Тошкент шаҳрида Ҳукуматлараро қўмитанинг биринчи мажлисини ўтказиш таклиф қилинди. Шунингдек, преференциал савдо, инвестицияларни ўзаро ҳимоя қилиш ва рағбатлантириш, шунингдек, халқаро автомобиль қатнови тўғрисидаги икки томонлама битимлар лойиҳаларини келишиш жараёнларини жадаллаштириш масаласи кўриб чиқилди.

Транспорт-логистика йўналишида авиақатновларни йўлга қўйиш имкониятларини ўрганиш, муқобил транспорт йўлакларини шакллантириш ҳамда тармоқ идоралари ўртасида тўғридан-тўғри ҳамкорликни ўрнатиш муҳимлиги қайд этилди.

Шу билан бирга, ироқлик вакилларнинг жорий йил ноябрь ойида Тошкент шаҳрида ўтказиладиган халқаро туристик ярмарка ҳамда “Янги Ўзбекистон: жаҳон бозорлари чорраҳаси” бизнес-форумида иштирок этиши масаласи кўриб чиқилди. Томонлар ушбу тадбирларга Ироқ вазирликлари, савдо-саноат палаталари ва ишбилармон доиралари, жумладан, Курдистон минтақаси тадбиркорларини жалб этишдан манфаатдор эканликларини билдирдилар.

Учрашувда томонлар ўзбек тадбиркорларининг Ироқ бозорига чиқиш имкониятларини кенгайтириш, ишбилармонлик сафарларини ташкил этиш ва виза олиш тартиб-қоидаларини соддалаштириш масалаларини ҳам муҳокама қилдилар.

Элчи Усама аль-Наши икки томонлама муносабатларни ривожлантиришдан манфаатдорлигини ва барча кўриб чиқилган ташаббусларни амалга ошириш учун яқин ҳамкорликка тайёрлигини тасдиқлади. Музокаралар якунида томонлар ушбу йўналишлардаги ишларни давом эттириш ҳамда амалий натижаларга эришиш бўйича келишувга эришдилар.

Эслатиб ўтамиз, Ўзбекистоннинг Кувайтдаги элчиси Аюбхон Юнусов 2025 йил октябрь ойида Ироқ Президенти Абдуллатиф Рашидга ҳам ишонч ёрлиқларини топширган эди.