ТОКИО, 12 октябрь. /“Дунё” АА/. Ўзбекистон дипломатлари  Япония парламенти Вакиллар палатаси депутати, Япония–Ўзбекистон парламентлараро дўстлик лигаси Ижроия қўмитаси раиси Кейсуке Судзуки билан учрашув ўтказди, деб хабар бермоқда “Дунё” АА мухбири.

Мулоқот чоғида икки мамлакат ўртасидаги кенгайтирилган стратегик шериклик муносабатларини янада мустаҳкамлаш, олий даражада эришилган келишувларни амалга ошириш ҳамда парламентлараро алоқаларни фаоллаштириш масалалари муҳокама қилинди.

Хусусан, Ўзбекистон Президентининг 2025 йил декабрь ойида Японияга расмий ташрифи ва жорий йил сентябрь ойида Токио шаҳрида бўлиб ўтган Ташқи ишлар вазирларининг иккинчи Стратегик мулоқоти доирасида эришилган келишувларнинг амалий ижроси кўриб чиқилди.

Шунингдек, савдо-иқтисодий, инвестициявий, ҳуқуқий соҳалар ҳамда меҳнат миграцияси йўналишларидаги ҳамкорликни янада ривожлантириш юзасидан фикр алмашилди.

Учрашув якунлари бўйича 2027 йилда Ўзбекистон ва Япония ўртасида дипломатик муносабатлар ўрнатилганининг 35 йиллигига бағишланган қўшма тадбирларни ишлаб чиқиш, шунингдек, парламентлараро ва амалий шерикликни янада жадаллаштириш бўйича келишувга эришилди.

Эслатиб ўтамиз, Ўзбекистон ва Япония ўртасида дипломатик муносабатлар 1992 йил 26 январда ўрнатилган.