СТОКГОЛЬМ, 8 май. /“Дунё” АА/. Швеция парламентида Ўзбекистон ва Қозоғистоннинг ушбу давлатдаги элчихоналари томонидан Марказий Осиё мамлакатлари билан ҳамкорлик бўйича парламент Дўстлик гуруҳи ҳамкорлигида бизнес-семинар ўтказилди, деб хабар бермоқда “Дунё” АА мухбири.

Семинарда Риксдаг (парламент) депутатлари, Швеция Ташқи ишлар вазирлиги, мамлакат Савдо палатаси, “Business Sweden”, “ISDP” ва “UI” каби таҳлилий марказлар ҳамда турли компаниялари вакиллари қатнашди.

Учрашувда Ўзбекистон элчихонаси мамлакатимизда амалга оширилаётган иқтисодий ислоҳотлар, сармоявий муҳитни яхшилаш чора-тадбирлари, саноат ва инфратузилма лойиҳаларининг ривожланиши ҳамда хорижий инвесторлар учун имкониятлар тўғрисида тақдимот ўтказди.

Озарбайжон­–Ўзбекистон инвестиция жамғармаси бош директори маслаҳатчиси Заур Бек қўшма инвестициялар ва капитал жалб этиш механизмлари ҳақида маълумот берди. Ўзбекистоннинг Швециядаги туризм элчиси Ҳелена Бергстрём мамлакатнинг сайёҳлик салоҳияти ва туризмнинг асосий йўналишлари хусусида сўз юритди.

Швеция вакиллари, жумладан, парламент Дўстлик гуруҳи раиси Бьёрн Сёдер, Риксдаг Саноат ва савдо қўмитаси раиси Тобиаса Андерссона ҳамда “ISDP” таҳлилий институти директори Сванте Корнелла сўнгги йилларда Ўзбекистоннинг ишбилармонлик муҳитида ижобий ўзгаришлар кузатилаётганини қайд этиб, Швеция компанияларини мамлакатдаги истиқболли лойиҳаларда фаолроқ иштирок этишга чақирди.

Тадбир якунида томонлар Швеция ишбилармон доиралари билан амалий ҳамкорликни фаоллаштириш, икки мамлакат тадбиркорлари ўртасида мунтазам бизнес мулоқотни йўлга қўйиш ҳамда Швециядан Ўзбекистонга бизнес-миссиялар сонини кўпайтиришга келишиб олди.