ОСТОНА, 10 май. /“Дунё” АА/. Қозоғистоннинг “Tribune” нашрида Ўзбекистон авиация соҳасида амалга оширилаётган йирик инфратузилма лойиҳаларига бағишланган мақола эълон қилинди, деб хабар беради “Дунё” АА мухбири.

Мақолада таъкидланишича, ушбу лойиҳалар йўловчи оқимини кўпайтириш, хусусий сармояларни жалб этиш ҳамда пойтахт ва ҳудудлар ўртасидаги юкламани қайта тақсимлашга йўналтирилган ҳолда мамлакат авиация бозорининг янги архитектурасини шакллантирмоқда.

Асосий лойиҳалардан бири – амалдаги аэропортга муқобил бўлиши ва халқаро ташувларнинг салмоқли қисмини ўз зиммасига олиши кўзда тутилган Тошкентнинг янги халқаро аэропорти – “Янги Тошкент” (Tashkent Eastern) қурилишидир. Режага кўра, лойиҳани амалга оширишнинг фаол босқичи 2026 йил июнь ойида бошланиши кутилмоқда.

Янги аэропортда транзит оқимларига мўлжалланган, юқори ўтказувчанлик қобилиятига эга йирик авиация хабини яратиш ва мамлакатнинг минтақавий логистика йўналишларига янада чуқур интеграциясини таъминлаш назарда тутилган.

Дастлабки ҳисоб-китобларга кўра, аэропортнинг ўтказувчанлик қуввати йилига 20 миллионгача йўловчини ташкил этади, келажакда эса бу кўрсаткични 30 миллионгача кенгайтириш имконияти мавжуд. Йўловчи терминали майдони эса тахминан 100–120 минг квадрат метрни ташкил этиши кутилмоқда.

Шу билан бирга, ҳудудларда ҳам авиация инфратузилмасини модернизация қилиш ишлари давом этмоқда. Наманганда халқаро аэропортнинг янги йўловчи терминали фойдаланишга топширилиш арафасида бўлиб, унинг очилиши 2026 йил июнь ойи охирига режалаштирилган. Айни пайтда объект қурилиши якуний босқичда. Ушбу лойиҳа аэропортнинг ўтказувчанлик қобилиятини йилига 1,5–2 миллион йўловчигача ошириш имконини беради.

Янги терминал майдони тахминан 20–25 минг квадрат метрни ташкил этиб, у соатига 600 нафаргача йўловчига хизмат кўрсатишга мўлжалланган. Бу, айниқса, 11 миллиондан ортиқ аҳолига эга ва ҳаво транспортига талаб юқори бўлган Фарғона водийси учун муҳим аҳамият касб этади.

Наманган аэропорти имкониятларининг кенгайтирилиши пойтахтга тушаётган юкламани камайтириб, минтақа аҳолиси учун халқаро йўналишларга чиқишни осонлаштиради.

Бухоро аэропорти лойиҳасига бўлган юқори қизиқиш эса авиация соҳасининг инвестицион жозибадорлигини яна бир бор тасдиқлади. Уни давлат-хусусий шериклик асосида қуриш ва модернизация қилиш бўйича тендерга тайёргарлик жараёнида 50 дан ортиқ компания, жумладан маҳаллий ва халқаро тузилмалар – аэропорт операторлари ҳамда инфратузилма жамғармалари иштирок этиш истагини билдирган.

Бундай фаоллик, айниқса авиация соҳасининг эркинлаштирилиши ва халқаро ташувлар кўламининг кенгайиши фонида, Ўзбекистон бозорининг ўсувчан ва истиқболли йўналиш сифатида қабул қилинаётганидан далолат беради.