МИЛАН, 6 май /“Дунё” АА/. Италиянинг Милан шаҳрида “Ломбардия ва Самарқанд: инвестиция имкониятлари” мавзусида бизнес-форуми ташкил этилди, деб хабар бермоқда “Дунё” АА мухбири.

Тадбирда Ломбардия вилояти губернатори Аттилио Фонтана, минтақанинг иқтисодий ривожланиш масалалари бўйича вазири Гвидо Гуидези, “SACE” давлат экспорт-кредит агентлиги, “SIMEST” инвестиция агентлиги, Италия компанияларининг ташқи иқтисодий фаолиятини қўллаб-қувватлаш агентлиги (ICE) ҳамда “Cassa Depositi e Prestiti” давлат инвестиция банки раҳбарлари иштирок этди.

Аттилио Фонтана Самарқанд билан алоқалар изчил ривожланиб бораётганини таъкидлаб, Ўзбекистонда амалга оширилаётган ислоҳотларни юқори баҳолади ҳамда инвестиция муҳити яхшиланганини қайд этди. Шу билан бирга, Ломбардия компанияларини Ўзбекистон бозорига янада фаол киришга чақирди.

Форум доирасида “Promos Italia” томонидан “Andersen Legal” билан ҳамкорликда тайёрланган Италия компаниялари учун Ўзбекистоннинг ишбилармонлик ва ҳуқуқий муҳитига оид таҳлилий маъруза тақдим этилди.

Шунингдек, Ўзбекистон томони Самарқанд вилояти Булунғур туманида Ломбардия саноат зонасини ташкил этиш лойиҳасини намойиш қилди. Тематик сессияларда қишлоқ хўжалиги, инфратузилма, тўқимачилик, фармацевтика ва саноат соҳаларидаги ҳамкорлик имкониятлари муҳокама қилинди.

Музокаралар давомида Ўзбекистон қишлоқ хўжалиги ва тўқимачилик маҳсулотларини Италияга экспорт қилиш, қишлоқ хўжалиги соҳасида қўшма лойиҳаларни амалга ошириш ҳамда саноат ускуналарини маҳаллийлаштириш бўйича келишувларга эришилди.

Вазир Гвидо Гуидези музокаралар давом эттирилиши ва июль ойида Италия компаниялари делегациясининг Ўзбекистонга ташрифи режалаштирилганини маълум қилди. Делегациянинг Самарқанддаги бўлажак саноат зонаси фаолияти билан яқиндан танишиши кўзда тутилган.