РИМ, 17 февраль. /“Дунё” АА/. Италиядаги Сапиенца университетида ўзбек талабалари иштирокида навбатдаги “Заковат” интеллектуал мусобақаси ўтказилди, деб хабар қилмоқда “Дунё” АА мухбири.

Элчихона ташаббуси билан ташкил этилган билимлар беллашуви “Италиядаги ўзбеклар жамоаси” фаоллари, Сапиенца университети ҳамда “Заковат” интеллектуал клуби вакиллари кўмагида ташкил этилди.

Интеллектуал ўйин 3 босқичда ўтказилди. Иштирокчилар 1-шартда “Zakovat QUIZ” (умумий 6 та раунд), 2-шартда “Zakovat savollari” ва 3-шартда “Blits savollar” бўйича қизиқарли ва мураккаб саволларга жавоб топиш орқали ўз билимини синовдан ўтказди.

3 босқичда 6 нафар талабадан иборат 12 та жамоа, жами ташкилий қўмита билан бирга 80 нафар иштирокчи қатнашди. Ушбу мусобақа Италияда ўқийдиган талабалар иштирокида ўтказилган катта тадбир бўлди.

Ўзбекистон элчиси Абат Файзуллаев тақдирлаш маросимида юртимизда ёшлар сиёсати, уларнинг таълим олиш сифатини оширишга ва чет элда таҳсил олаётган талабаларимизга берилаётган эътибор тўғрисида тўхталиб ўтди.

Элчи Италияда таълим олаётган ўзбек ёшларини ўқишни муваффақиятли тамомлаб, чуқур билим ва кўникмаларга эга бўлганидан сўнг ватанимизга қайтиб, иқтисодиётимиз ва жамият ривожига ўз ҳиссасини қўшишга чорлади.

Беллашув ғолиблари қуйидагича эълон қилинди: 1-ўрин “Fiat 500”, 2-ўрин “Infiniti” ва 3-ўринни эгаллаган “Вазирлик талабалари” жамоалари мусобақа кубоги, фахрий медаллар, махсус сертификатлар ҳамда “Заковат интеллектуал клуби” ҳомийлиги билан тўпланган пул совринлари билан мукофотланди.

Шунингдек, интеллектуал мусобақада қатнашган энг фаол эркак ва аёл иштирокчи ва бошқа йўналишларда фаол талабалар элчихона томонидан махсус сертификатлар билан тақдирланди.